9-வது ஆசிய கோப்பை மகளிர் கிரிக்கெட் தொடரின் நேற்றிரவு நடைபெற்ற போட்டியில் இந்தியா, நேபாளம் அணிகள் மோதின.
இந்த போட்டியில் முதலில் நாணய சுழற்சியில் வென்ற இந்திய அணி துடுப்பெடுத்தாட தீர்மானித்தது.
அதன்படி, இந்திய அணி 20 ஓவர்களில் 3 விக்கெட்டுகளை இழந்து 178 ஓட்டங்களை குவித்தது.
179 என்ற வெற்றி இலக்கோடு களமிறங்கிய நேபாள அணி 20 ஓவர்கள் நிறைவில், 9 விக்கெட்டுகளை இழந்து 96 ஓட்டங்களை மட்டுமே பெற்றது.
இதனால் இந்திய அணி 82 ஓட்டங்கள் வித்தியாசத்தில் வெற்றியை தழுவியது.
இந்திய அணி சார்பில் தீப்தி ஷர்மா மூன்று விக்கெட்டுகளையும், அருந்ததி ரெட்டி மற்றும் ராதா யாதவ் தலா இரண்டு விக்கெட்டுகளையும், ரேனுகா சிங் ஒரு விக்கெட் வீழ்த்தினர். நேற்றைய போட்டியில் வெற்றி பெற்றதன் மூலம் இந்திய அணி அரையிறுதி சுற்றுக்கு முன்னேறியுள்ளமை குறிப்பிடத்தக்கது.
