போர் நிறுத்த பேச்சுவார்த்தையில் இருந்து பின்வாங்கியதா ரஷியா ?

உக்ரைன் – ரஷியா இடையேயான போர் இன்று 905 நாளாக நீடித்து வரும் நிலையில் இந்த போரில் இதுவரை ஆயிரக்கணக்கானோர் உயிரிழந்துள்ளனர்.
இந்த போரில் உக்ரைனுக்கான ஆயுத உதவிகளை அமெரிக்கா உள்பட மேற்கத்திய நாடுகள் வழங்கி வருகின்றன. இந்நிலையில் இரு நாடுகளுக்கும் இடையிலான போரை நிறுத்த பல்வேறு நாடுகள் முயற்சித்துவரும் நிலையில் அமைதி பேச்சுவார்த்தைக்கு இரு நாடுகளும் உடன்படாததால் போர் பதற்றம் தொடர்ந்தும் நீடித்து வருகிறது.
இதனிடையே, 2 ஆண்டுகளுக்கு மேலாக நீடித்து வரும் போரை முடிவுக்கு கொண்டுவர ரஷியா பேச்சுவார்த்தைக்கு முன்வந்திருந்த நிலையில் உக்ரைன் நடத்திய தாக்குதலால் பேச்சுவார்த்தை முயற்சி தோல்வியடைந்துள்ளதாக செய்திகள் வெளியாகியுள்ளன.
கட்டார் தலைநகர் டோஹாவில் இம்மாத தொடக்கத்தில் உக்ரைன் மற்றும் ரஷியா இடையேயான போர் நிறுத்த பேச்சுவார்த்தை நடைபெறவிருந்தது.
இந்நிலையில், ரஷியாவின் குர்ஷ்க் மாகாணத்தின் மீது உக்ரைன் திடீர் தாக்குதல் நடத்தியதில் கடந்த 6ம் தேதி ஆயிரத்திற்கும் மேற்பட்ட உக்ரைன் வீரர்கள், ராணுவ டாங்கிகள், ஆயுதங்களுடன் ரஷியாவின் குர்ஷ்க் மாகாணத்திற்குள் நுழைந்தனர்.
இதேவேளை , ரஷ்ய வீரர்களை பணய கைதிகளாக சிறைபிடித்ததோடுஅப்பகுதியில் ராணுவ நிலைகளை அமைத்துள்ள உக்ரைன் ராணுவம் சுமார் 400 சதுர கிலோமீட்டர் பரப்பளவை கைப்பற்றியுள்ளதாக தகவல் வெளியாகியுள்ளது.
உக்ரைன் நடத்திய திடீர் தாக்குதலால் தோஹாவில் நடைபெறவிருந்த போர் நிறுத்த பேச்சுவார்த்தையில் இருந்து ரஷியா பின்வாங்கியுள்ளதாக செய்திகள் வெளியாகியுள்ளன. இதன் மூலம் உக்ரைன் – ரஷியா இடையேயான போர் மேலும் பல மாதங்கள் நீடிக்கலாம் என தகவல் வெளியாகியுள்ளமை குறிப்பிடத்தக்கது.