உத்தரபிரதேச மாநிலம் கான்பூரில் உள்ள குஜைனி பகுதியில் உள்ள தேசிய நெடுஞ்சாலையில் தலை துண்டிக்கப்பட்டு பெண்ணின் உடல் நிர்வாண நிலையில் வீதியில் இருந்தமையை அவதானித்து பொலிஸாருக்கு தகவல் வழங்கியதையடுத்து சம்பவ இடத்துக்கு விரைந்த பொலிஸார் பெண்ணின் உடலை கைப்பற்றினர்.
இது தொடர்பில் பொலிஸாரின் முதற்கட்ட விசாரைணயில , அப்பெண்ணை பாலியல் துன்புறுத்தலுக்கு உட்படுத்தி தலையை துண்டித்து கொலை செய்து, நிர்வாண நிலையில் உடலை சாலையில் வீசி இருக்கலாம் என்று சந்தேகம் வெளியிட்டுள்ளனர். கொலை செய்யப்பட்ட அந்த பெண் யார் என்பது குறித்து விசாரணைகளை பொலிஸார் ஆரம்பித்துள்ளனர்.
அப்பகுதியில் உள்ள கண்காணிப்பு கேமராக்களை ஆய்வு செய்த போது அதில் நெடுஞ்சாலையின் மறுபுறத்தில் உள்ள வைத்தியசாலையில் பொருத்தப்பட்டிருந்த கண்காணிப்பு கேமராவில், உடல் கிடந்த இடம் அருகே ஒரு பெண் நடந்து செல்வது பதிவாகியுள்ளது.
அவர் சாம்பல் நிற கால்சட்டை அணிந்திருந்ததாகவும், அதேவேளையில் பெண் உடல் அருகே சாம்பல் நிற ஆடையின் துண்டுகள் இருந்ததாகவும் குறிப்பிட்டுள்ளனர்.
இதுகுறித்து மேலும் பொலிஸார் தெரிவிக்கையில், உடல் கண்டெடுக்கப்பட்ட இடத்தில் கண்காணிப்பு கேமராக்கள் இல்லை என்றும் ஆனால் சுமார் 3 கி.மீ தொலைவில் உள்ள கேமராவில் பெண் ஒருவர் தனியாக நடந்து செல்லும் காட்சிகள் பதிவாகியுள்ளதாகவும் தெரிவித்துள்ளனர்.
குறித்த பெண் குறித்து பொலிஸார் அப்பகுதி பொதுமக்களிடம் விசாரணைகளை மேற்கொண்டு வருகின்றனர். குற்றவாளிகளை பிடிக்க 3 தனிப்படைகள் அமைக்கப்பட்டுள்ளன.
