மட்டக்களப்பு மாவட்டத்தில் வெள்ளம் வடிந்து வருவதால் போக்குவரத்து சேவைகள் உட்பட அன்றாட நடவடிக்கைகள் வழமைக்கு திரும்புகின்றன
மட்டக்களப்பு மாவட்டத்தில் ஏற்பட்ட பெருவெள்ளம் காரணமாக மக்களின் இயல்பு வாழ்க்கையை கடந்த ஒரு வார காலமாக மிகவும் பாதிக்கப்பட்டிருந்தது.
நேற்றும் இன்றும் மழை பெய்யாததன் காரணமாக மாவட்டமெங்கும் ஏற்பட்டிருந்த வெள்ளப்பெருக்கு படிப்படியாக வடிந்து வருகின்றது இதனால் போக்குவரத்து சேவைகள் வழமைக்கு திரும்பி உள்ளன.
மட்டக்களப்பு நகரையும் கொக்கொட்டிச் சோலையையும் இணைக்கின்ற மிகப்பெரிய பாலமான மண்முனை பாலத்தின் மேலால் 3 அடிக்கு மேல் பாய்ந்த பாரிய வெள்ளம் முழுமையாக வடிந்துள்ளது இதனால் கொக்கொட்டிச்சோலை, ஆரையம்பதி, காத்தான்குடி போன்ற பிரதேச செயலக பிரிவுகளினூடான மட்டக்களப்பு நகருக்கான போக்குவரத்து சேவைகள் வழமைக்குத் திரும்பியுள்ளன .
இதேநேரம் கடந்த ஒரு வார காலமாக தங்களுடைய தொழில் வாய்ப்புகளை இழந்திருந்த அங்காடி வியாபாரிகள் மற்றும் மீனவர்கள் தங்களுடைய தொழிலுக்கு செல்வதையும் மீன்பிடி நடவடிக்கைகளில் மீனவர்கள் ஈடுபட்டு வருவதையும் அவதானிக்க கூடியதாக முடிந்ததாக எமது பிராந்திய செய்தியாளர் குறிப்பிட்டார்.
