தற்காப்புக்கான துப்பாக்கிகளை தனி நபருக்கு ஒன்று மட்டுமே வழங்கும் புதிய கொள்கையை பாதுகாப்பு அமைச்சு அறிவித்துள்ளது.
பொதுமக்கள் மத்தியில் துப்பாக்கி விநியோகம் மற்றும் பாவனையை மதிப்பிடுவதற்காக நடத்தப்பட்ட விரிவான ஆய்வை அடுத்து இந்த முடிவு எடுக்கப்பட்டுள்ளதாக பாதுகாப்பு அமைச்சு தெரிவித்துள்ளது.
ஒரு நபருக்கு ஒன்றுக்கு மேற்பட்ட துப்பாக்கிகளை பயன்படுத்த வேண்டிய அவசியம் ஏற்பட்டால், பாதுகாப்பு பகுப்பாய்வு நடத்தப்பட்டு தேவையான நடவடிக்கைகள் எடுக்கப்படும்.
எனினும், அந்த பகுப்பாய்வின் பின்னர் மற்றொரு துப்பாக்கி வழங்குவதா? இல்லையா? இறுதி முடிவை பாதுகாப்பு அமைச்சு தீர்மானிக்கும்.
பொதுமக்களுக்கு வழங்கப்பட்ட துப்பாக்கிகள் தொடர்பான ஆய்வுகள் தற்போது பாதுகாப்பு அமைச்சின் வளாகத்தில் நடத்தப்படுகின்றன.
அந்த ஆய்வில் பொதுமக்களுக்கு 1500க்கும் மேற்பட்ட துப்பாக்கிகள் வழங்கப்பட்டுள்ளதுடன், சில நபர்களுக்கு ஒன்றுக்கு மேற்பட்ட துப்பாக்கிகள் வழங்கப்பட்டுள்ளதாகவும் தகவல்கள் வெளியாகியுள்ளன.
முன்னதாக பொதுமக்களுக்கு வழங்கப்பட்ட துப்பாக்கிகளை மீள ஒப்படைக்குமாறு பாதுகாப்பு அமைச்சு அறிவித்திருந்தமையும் குறிப்பிடத்தக்கது.
