வாகன இறக்குமதி: புதிய விலைகள் குறித்து ஜனாதிபதி அறிவிப்பு!

எதிர்வரும் பெப்ரவரி மாதம் வாகன இறக்குமதியை மீள ஆரம்பிக்கும் போது விலை அதிகரிப்பு காணப்பட்டாலும், சந்தை நடத்தைக்கு ஏற்ப விலை பின்னர் படிப்படியாக குறைவடையும் என ஜனாதிபதி அநுரகுமார திஸாநாயக்க நேற்று (21) தெரிவித்தார்.

நேற்றிரவு ஒரு தொலைக்காட்சி நிகழ்ச்சியில் பங்கேற்ற அவர், முதல் சில மாதங்களில் அதிக தேவையை சமாளிக்க வாகனங்களின் விலை ஆரம்பத்தில் உயரும் என்றார்.

ஆனால் காலப்போக்கில், இந்த அழுத்தத்தை படிப்படியாக குறைக்க அரசாங்கம் திட்டமிட்டுள்ளதாகவும் அவர் குறிப்பிட்டார்.

2018 மற்றும் 2019 ஆம் ஆண்டில் ஆண்டுக்கு 1 முதல் 2 பில்லியன் டொலர் மதிப்புள்ள வாகனங்கள் இறக்குமதி செய்யப்பட்டுள்ளன.

குறிப்பாக, 2018 ஆம் ஆண்டில் கிட்டத்தட்ட 2 பில்லியன் அமெரிக்க டொலர் மதிப்புள்ள வாகனங்கள் இறக்குமதி செய்யப்பட்டுள்ளன.

2019 ஆம் ஆண்டில் 1.4 பில்லியன் டொலர் மதிப்பிலான வாகனங்கள் இறக்குமதி செய்யப்பட்டன.

இந்த நிலையில் 5 வருட இடைவேளையின் பின்னரான வாகன சந்தையை மீண்டும் திறக்கும் முடிவு நாட்டின் பொருளாதாரத்தை முன்னோக்கி செலுத்துவதற்கான ஒரு படியாகும்.

எனினும், இந்த மறுதொடக்கம் தற்போதைய டொலர் கையிருப்பில் எதிர்மறையான தாக்கத்தை ஏற்படுத்தக்கூடாது என்றும் ஜனாதிபதி கூறினார்.

முன்னதாக வாகனச் சந்தையில் டொலர் பெறுமதி 190 ரூபாவாக இருந்தபோது வாகனங்கள் இறக்குமதி செய்யப்பட்டது.

தற்போது டொலரின் விலை 300 ரூபாவாக இருப்பதால், புதிய வாகனங்களின் விலை டொலர் மாற்று விகிதத்திற்கு ஏற்ப 40% அதிகரிக்கும்.

இதனிடையே, இறக்குமதிகள் நிறுத்தப்பட்டதன் காரணமாக, அதிக விலையில் குத்தகை வசதிகளின் கீழ் பல வாகனங்கள் வாங்கப்பட்டதன் காரணமாக, செகண்ட் ஹேண்ட் வாகனச் சந்தை உருவாகியுள்ளது.

எனவே செகண்ட் ஹேண்ட் மற்றும் புத்தம் புதிய வாகன சந்தை விலைகளுக்கு இடையே மோதல்களைத் தவிர்க்க நடவடிக்கைகள் எடுக்கப்பட வேண்டும்.

பெப்ரவரி 1 முதல் 1.2 பில்லியன் டொலர் மதிப்புள்ள வாகனங்களை இறக்குமதி செய்ய அரசாங்கம் திட்டமிட்டுள்ளது, ஆண்டு முழுவதும் இறக்குமதி தொடரும்.

எனினும் பெப்ரவரி மாதத்தில் அனைத்து வாகன இறக்குமதிகளுக்கும் ஒரே நேரத்தில் சந்தையைத் திறக்க அரசாங்கம் உத்தேசிக்கவில்லை.

இதுவரை சுமார் 20,000 வாகன அனுமதிப்பத்திரங்கள் வழங்கப்பட்டுள்ளன, ஆனால் அந்த அனுமதிப்பத்திரம் வைத்திருப்பவர்களுக்கு தற்போது இறக்குமதிக்கு இடமளிக்கப்படாது.

அரசாங்கம் தற்போது இந்த அனுமதிப்பத்திரம் வைத்திருப்பவர்களுக்கான மாற்று ஏற்பாடுகளை ஆலோசித்து வருகிறது.

2018 ஆம் ஆண்டில், வாகன அனுமதிப்பத்திரத்திற்காக 1.9 பில்லியன் அமெரிக்க டொலர்கள் ஒதுக்கப்பட்டது என்றும் அவர் மேலும் கூறினார்.