பத்மபூஷன் விருது அறிவிக்கப்பட்டுள்ள நடிகர் அஜித்குமாருக்கு, நடிகர் ரஜினிகாந்த் வாழ்த்துத் தெரிவித்துள்ளார். நாட்டில் கலை, அறிவியல் சமூகப்பணி, பொதுப்பணி, அறிவியல், வர்த்தகம், மருத்துவம், இலக்கியம், கல்வி, விளையாட்டு உள்ளிட்ட துறைகளில் சிறந்து விளங்குபவர்களுக்கு நாட்டின் உயிரிய விருதான பத்ம ஸ்ரீ, பத்ம பூஷன், பத்ம விபூஷண் ஆகிய விருதுகளை மத்திய அரசு வழங்கி வருகின்றது.
இந்நிலையில், 2025-ம் ஆண்டுக்கான பத்ம ஸ்ரீ விருதுகளை மத்திய அரசு சமீபத்தில் அறிவித்தது. அதன்படி, நடிகர் அஜித்குமாருக்கு பத்ம பூஷன் விருது அறிவிக்கப்பட்டுள்ளது. இதற்கு பல்வேறு தரப்பினரும் வாழ்த்து தெரிவித்து வருகின்றனர். இந்நிலையில், ‘கூலி’ திரைப்படத்தின் படப்பிடிப்பை முடித்துக்கொண்டு ரஜினிகாந்த் தாய்லாந்தில் இருந்து விமானம் மூலம் கிளம்பி இன்று அதிகாலை சென்னைக்குத் திரும்பினார். அப்போது விமான நிலையத்தில் கூடியிருந்த ஊடகவியலாளர்கள் அவரிடம், நடிகர் அஜித் குமாருக்கு பத்மபூஷன் விருது அறிவிக்கப்பட்டது குறித்து கேள்வி எழுப்பியுள்ளனர்.
அதற்குப் பதிலளித்த ரஜினி, “வாழ்த்துகள்… வாழ்த்துகள்” என ஒற்றை வரியில் பதிலளித்து விட்டு காரில் புறப்பட்டு சென்றுள்ளதாகத் தெரிவிக்கப்பட்டுள்ளது.
