மனித மதிப்புகள் மற்றும் திறன்களை மேம்படுத்துவதற்கான ஒரு வழிமுறையாக இந்தியா செயற்கை நுண்ணறிவை (AI) பார்க்கிறது என்று பிரதமர் நரேந்திர மோடி கூறினார்.
மேலும், AI நிர்வாகத்தில் அச்சங்களை தீர்ப்பதற்கும் புதுமைகளை ஊக்குவிப்பதற்கும் சமமான முன்னுரிமை அளிக்க வேண்டும் என்றும், பொறுப்பான AIக்காக நாடுகள் ஒன்றிணைந்து செயல்பட வேண்டும் என்றும் அவர் அழைப்பு விடுத்தார்.
ஞாயிற்றுக்கிழமை (06) ‘பன்முகத்தன்மை, பொருளாதார-நிதி விவகாரங்கள் மற்றும் செயற்கை நுண்ணறிவை வலுப்படுத்துதல்’ என்ற தலைப்பிலான பிரிக்ஸ் உச்சி மாநாட்டின் அமர்வில் உரையாற்றும் போது இந்தியப் பிரதமர் இந்த விடயங்களை கூறினார்.
அத்துடன், அடுத்த ஆண்டு இந்தியாவில் நடைபெறவிருக்கும் ‘AI தாக்க உச்சி மாநாட்டில்’ பங்கேற்க பிரிக்ஸ் நாடுகளுக்கும் அவர் இதன்போது அழைப்பு விடுத்தார்.
இது தொடர்பில் மேலும் உரையாற்றிய மோடி,
21 ஆம் நூற்றாண்டில், மனிதகுலத்தின் செழிப்பும் முன்னேற்றமும் தொழில்நுட்பத்தை, குறிப்பாக செயற்கை நுண்ணறிவைச் சார்ந்துள்ளது.
ஒருபுறம், ஒரு சாதாரண மனிதனின் வாழ்க்கையில் மாற்றத்தைக் கொண்டுவருவதற்கு செயற்கை நுண்ணறிவு மிகவும் பயனுள்ள வழிமுறையாகும்.
மறுபுறம், அபாயங்கள், நெறிமுறைகள், சார்பு போன்ற கேள்விகளும் செயற்கை நுண்ணறிவுடன் தொடர்புடையவை.
இந்த விஷயத்தில் இந்தியாவின் சிந்தனை மற்றும் கொள்கை தெளிவாக உள்ளது.
மனித மதிப்புகள் மற்றும் திறன்களை மேம்படுத்துவதற்கான ஒரு ஊடகமாக AI ஐ நாங்கள் பார்க்கிறோம்.
இன்று, இந்தியா விவசாயம், சுகாதாரம், கல்வி, நிர்வாகம் போன்ற துறைகளில் AI ஐ தீவிரமாகவும் விரிவாகவும் பயன்படுத்துகிறது.
AI நிர்வாகத்தில் அச்சங்களை தீர்ப்பது மற்றும் புதுமைகளை ஊக்குவித்தல் ஆகிய இரண்டிற்கும் சமமான முன்னுரிமை அளிக்கப்பட வேண்டும் என்று நாங்கள் நம்புகிறோம்.
பொறுப்பான AI-க்காக நாம் ஒன்றிணைந்து செயல்பட வேண்டும்.
டிஜிட்டல் உள்ளடக்கத்தின் நம்பகத்தன்மையை சரிபார்க்கக்கூடிய உலகளாவிய தரநிலைகள் உருவாக்கப்பட வேண்டும், இதனால் உள்ளடக்கத்தின் மூலத்தை அறிய முடியும், வெளிப்படைத்தன்மை பராமரிக்கப்படும் மற்றும் தவறாகப் பயன்படுத்தப்படுவதை நிறுத்த முடியும்.
இன்றைய கூட்டத்தில் வெளியிடப்பட்ட AI-யின் உலகளாவிய நிர்வாகம் குறித்த தலைவர்களின் அறிக்கை இந்த திசையில் ஒரு நேர்மறையான படியாகும்.
அனைத்து நாடுகளுக்கும் இடையே ஒருங்கிணைப்பை அதிகரிக்க, அடுத்த ஆண்டு, இந்தியாவில் “AI தாக்க உச்சிமாநாட்டை” ஏற்பாடு செய்ய உள்ளோம்.
இந்த உச்சிமாநாட்டை வெற்றிகரமாக மாற்றுவதில் நீங்கள் அனைவரும் தீவிரமாக பங்களிப்பீர்கள் என்று நாங்கள் நம்புகிறோம் – என்றார்.
