வெளிநாட்டு கடன் மறுசீரமைப்பு செயல்முறை தொடர்பாக இலங்கையும் ஜெர்மனியும் இருதரப்பு ஒப்பந்தத்தில் கையெழுத்திட்டுள்ளதாக நிதி அமைச்சு ஒரு அறிக்கையில் தெரிவித்துள்ளது.
இந்த ஒப்பந்தம் ஒரு குறிப்பிடத்தக்க மைல்கல்லைக் குறிப்பதுடன், கடன் நிலைத்தன்மையை மீட்டெடுப்பதற்கும் பொருளாதாரத்தை புதுப்பிப்பதற்கும் கடன் மறுசீரமைப்பு செயல்முறையை வெற்றிகரமாக முடிப்பதற்கான இலங்கை அரசாங்கத்தின் தொடர்ச்சியான உறுதிப்பாட்டை பிரதிபலிக்கிறது என்று நிதி அமைச்சு அந்த அறிக்கையில் சுட்டிக்காட்டியுள்ளது.
ஒப்பந்தத்தின் படி, அதிகாரப்பூர்வ கடன் வழங்குநர் குழுவுடன் (OCC) புரிந்துணர்வு ஒப்பந்தம் முடிவடைந்த பின்னர் இருதரப்பு கலந்துரையாடல்களைத் தொடர்ந்து, நிலுவையில் உள்ள கடன்களை மறுசீரமைப்பதன் மூலம் கடன் நிவாரண நடவடிக்கையை நீட்டிக்க ஜெர்மன் அரசு ஒப்புக்கொண்டது.
இருதரப்பு ஒப்பந்தத்தில் இலங்கை அரசாங்கத்தின் சார்பாக நிதி, திட்டமிடல் மற்றும் பொருளாதார அபிவிருத்தி அமைச்சின் செயலாளர் கலாநிதி ஹர்ஷன சூரியப்பெருமவும், ஜெர்மன் கூட்டாட்சிக் குடியரசின் சார்பாக நிதி அமைச்சின் பொறுப்பாளர் சாரா ஹாசல்பார்த்தும் கையெழுத்திட்டனர்.
இந்த ஒப்பந்தத்தின் கீழ் மதிப்பிடப்பட்ட மறு திட்டமிடப்பட்ட கடன் 188 மில்லியன் யூரோக்கள் என்று நிதி அமைச்சு தெரிவித்துள்ளது.
இந்த ஒப்பந்தத்தில் நுழைவது நிச்சயமாக ஜெர்மன் கூட்டாட்சி குடியரசுக்கும் இலங்கை அரசாங்கத்திற்கும் இடையிலான ஆழமான மற்றும் நீண்டகால இருதரப்பு உறவுகளை மேலும் வளர்ப்பதற்கு வழிவகுக்கும் என்று நிதி அமைச்சு நம்பிக்கை வெளியிட்டுள்ளது.
