ஓமான் அணிக்கு எதிரான ஐசிசி 2026 டி:20 உலகக் கிண்ணப் போட்டியில் இலங்கை அணியானது 225 ஓட்டங்களை குவித்துள்ளது.
இலங்கை அணித் தலைவர் தசூன் ஷானக்கவின் விரைவான அரைசதம், பவன் ரத்நாயக்க மற்றும் குசல் மெண்டீஸ் ஆகியோரின் மகத்தான பங்களிப்பும் ஓமானுக்கு எதிராக இமாலய இலக்கினை நிர்ணயிக்க இலங்கைக்கு உதவியது.
கண்டி, பல்லேகல சர்வதேச கிரிக்கெட் மைதானத்தில் இன்று காலை 11.00 மணிக்கு ஆரம்பமான ஐசிசி 2026 டி:20 உலகக் கிண்ணத் தொடரின் 16 ஆவது போட்டியில் ஓமான் அணி நாணய சுழற்சியில் வெற்றி பெற்று பந்து வீசத் தீர்மானித்தது.
அதன்படி, முதலில் துடுப்பெடுத்தாடிய இலங்கை 20 ஓவர்களில் 5 விக்கெட் இழப்புக்கு 225 ஓட்டங்களை குவித்தது.
ஆரம்ப துடுப்பாட்ட வீரர்களாக களமிறங்கிய பத்தும் நிஸ்ஸங்க (13) மற்றும் கமில் மிஷார ஆகியோர் (08) ஓட்டங்களுடன் விரைவாக ஆட்டமிழந்து வெளியேறினர்.
எனினும் அதன் பின்னர் மூன்றாவது விக்கெட்டுக்காக கைகோர்த்த குசல் மெண்டீஸ் மற்றும் பவன் ரத்நாயக்க ஆகியோர் கைகோர்த்து அணிக்கு நங்கூரமிட்டனர்.
குசல் மெண்டீஸ் 45 பந்துகளில் 7 பவுண்டரிகள் அடங்கலாக 61 ஓட்டங்களையும், பவன் ரத்நாயக்க 28 பந்துகளில் 8 பவுண்டரிகள், ஒரு சிக்ஸர் உள்ளடங்களாக 60 ஓட்டங்களையும் எடுத்து ஆட்டமிழந்தனர்.
அவர்களை அடுத்து தசூன் ஷானக்க 20 பந்துகளில் 5 சிக்ஸர்கள், 2 பவுண்டரிகள் அடங்கலாக 50 ஓட்டங்களை அதிகபடியாக பெற்றார்.
ஓமான் அணி தற்சமயம் 226 ஓட்டங்களை நோக்கி தனது இன்னிங்ஸை ஆரம்பித்துள்ளது.
