ஈரானின் உயர் தலைவராக மொஜ்தபா காமெனி தெரிவாகியுள்ளதற்கு வட கொரியா தனது முழுமையான ஆதரவை அறிவித்துள்ளது.
ஈரான் மீது அமெரிக்காவும் இஸ்ரேலும் நடத்தி வரும் சட்டவிரோத தாக்குதல்களை மீண்டும் கண்டிப்பதாகவும் அரசு ஊடகங்கள் செய்தி வெளியிட்டுள்ளன.
வட கொரிய அரசு செய்தி நிறுவனமான KCNA வெளிவிவகார அமைச்சகத்தின் செய்தித் தொடர்பாளர் வெளியிட்டுள்ள அறிக்கையை சுட்டிக்காட்டியுள்ளது.
பெப்ரவரி 28 அன்று போரின் தொடக்கத்தில் அமெரிக்க-இஸ்ரேலிய தாக்குதலில் கொல்லப்பட்ட உயர் தலைவர் அயதுல்லா அலி காமெனியின் மகனான மொஜ்தபா காமெனியை நாட்டின் புதிய உயர் தலைவராக தெரிவு செய்துள்ளதை வட கொரியா மதிப்பதாக அதில் கூறப்பட்டுள்ளது.
மேலும், ஈரானுக்கு எதிராக சட்டவிரோத இராணுவத் தாக்குதலை நடத்துவதன் மூலம், பிராந்திய அமைதி மற்றும் பாதுகாப்பின் அடித்தளத்தை சீர்குலைத்து, சர்வதேச அளவில் நிலையற்ற தன்மையை உருவாக்கி வரும் அமெரிக்கா மற்றும் இஸ்ரேலின் ஆக்கிரமிப்புக்கு வட கொரியா மிகுந்த கவலையை பதிவு செய்வதாகவும் அறிக்கையில் குறிப்பிடப்பட்டுள்ளது.
அத்துடன், ஒரு நாட்டின் அரசியல் அமைப்பு மற்றும் பிராந்திய ஒருமைப்பாட்டை குறைமதிப்பிற்கு உட்படுத்தும் தாக்குதல்களையும் வட கொரியா கண்டிப்பதாகவும், இது ஏற்றுக்கொள்ள முடியாதது மற்றும் முழு உலகமும் கண்டித்து நிராகரிக்கப்பட வேண்டும் என்றும் வலியுறுத்தப்பட்டுள்ளது.
12 நாட்களுக்கு முன்பு ஈரான் மீது அமெரிக்கா-இஸ்ரேல் போர் தொடங்கியதைத் தொடர்ந்து, மத்திய கிழக்கில் நாச வேலையை இரு நாடுகளும் முன்னெடுப்பதாக வட கொரியா கண்டித்தது
