நிர்ணயிக்கப்பட்ட கட்டணத்தை விட அதிகக் கட்டணம் வசூலிக்கும் பேருந்துகள் மற்றும் சட்டவிரோதப் பேருந்து சேவைகள் குறித்து முறைப்பாடு செய்யுமாறு தேசிய போக்குவரத்து ஆணைக்குழு பயணிகளைக் கேட்டுக்கொண்டுள்ளது.
பண்டிகைக் காலங்களில் பேருந்து பயணிகளிடம் அதிக கட்டணம் அறவிடப்படுவதைத் தடுக்கும் நோக்கில் தேசிய போக்குவரத்து ஆணைக்குழு விசேட நடவடிக்கைகளை முன்னெடுத்துள்ளது.
இது குறித்து நடைபெற்ற ஊடகவியலாளர் சந்திப்பில் பேசிய ஆணைக்குழுவின் செயற்பாட்டு பணிப்பாளர் ஷெரின் அத்துகோரல, பயணிகள் தங்களைச் சுரண்டும் பேருந்துகள் குறித்து 1955 என்ற இலக்கத்திற்குத் தொடர்பு கொண்டு முறைப்பாடு செய்ய முடியும் எனத் தெரிவித்தார்.
பண்டிகைக் கால நெரிசலைப் பயன்படுத்தி, முறையான அனுமதிப்பத்திரம் இன்றிப் பயணிகளை ஏற்றிச் செல்லும் பேருந்துகள் குறித்துப் பொதுமக்கள் அவதானமாக இருக்க வேண்டும் என அவர் எச்சரித்தார்.
இவ்வாறான பேருந்துகளே பயணிகளிடம் அதிக கட்டணத்தைச் வசூலிப்பதாக அவர் சுட்டிக்காட்டினார்.
கடந்த 11-ஆம் திகதி (நேற்று) கொழும்பிலிருந்து அனுமதிப்பத்திரம் இன்றிப் பயணத்தை ஆரம்பிக்கத் தயாராக இருந்த 7 பேருந்துகளைச் சட்டத்தின் பிடியில் சிக்கவைக்க முடிந்ததாகப் பணிப்பாளர் தெரிவித்தார்.
அந்தப் பேருந்துகள் உடனடியாக அந்த இடத்திலேயே நீதிமன்றத்தில் முன்னிலைப்படுத்தப்பட்டு, தேவையான சட்ட நடவடிக்கைகள் எடுக்கப்பட்டதாகவும் அவர் மேலும் குறிப்பிட்டார்.
பயணிகள் தமது பயணத்தின் போது எவ்வித அநீதிகளுக்கும் உள்ளாகாமல் இருக்க, முறையான அனுமதி பெற்ற பேருந்துகளில் மாத்திரம் பயணிக்குமாறும், ஏதேனும் விதிமீறல்கள் நடந்தால் உடனடியாக அதிகாரிகளுக்குத் தெரியப்படுத்துமாறும் ஆணைக்குழு வலியுறுத்தியுள்ளது.
