உலகக் கிண்ணத்தை வென்ற ஸ்பெய்னின் கால்பந்து அணி திங்களன்று (20) நாடு திரும்பியது.
மாட்ரிட் நகரின் வீதிகள் வழியாகச் சென்ற அந்த அணியை வரவேற்க சுமார் 20 லட்சம் பேர் திரண்டிருந்ததாக தகவல்கள் தெரிவிக்கின்றன.
நியூ ஜெர்சியில் ஞாயிற்றுக்கிழமை நடைபெற்ற இறுதிப் போட்டியில் ஆர்ஜென்டினாவை 1-0 என்ற கணக்கில் வீழ்த்திய மறுநாள் ஸ்பெய்ன் தலைநகரை வந்தடைந்த 26 வீரர்களும் அவர்களது பயிற்சியாளர் குழுவினரும், அந்நாட்டின் அரச குடும்பத்தினரையும் பின்னர் பிரதமர் பெட்ரோ சான்செஸையும் சந்தித்தனர்.
பின்னர், அந்த அணி வீரர்கள் திறந்தவெளிப் பேருந்து ஒன்றில் ஏறி, மாட்ரிட் நகரின் மையப்பகுதியில் உற்சாகமான ஊர்வலத்தை மேற்கொண்டனர்.
அப்பேருந்தில் “Stars shine together” (நட்சத்திரங்கள் ஒன்றிணைந்து ஜொலிக்கின்றன) என்ற வாசகமும், கால்பந்து வீரர்களின் புகைப்படங்களும் இடம்பெற்றிருந்தன.
உலகக் கிண்ணத்தை ஏந்தியபடியும், ‘Somos Campeones’ (நாங்கள் சாம்பியன்கள்) என்று எழுதப்பட்ட சட்டைகளை அணிந்தபடியும் இருந்த வீரர்கள், ஊர்வலப் பாதையில் ரசிகர்களுடன் நடனமாடியும் அவர்களுடன் கலந்துரையாடியும் சென்றனர்.
பிரதமரின் அதிகாரப்பூர்வ இல்லமான மோன்க்லோவா (Moncloa) அரண்மனைக்கு அருகிலிருந்து சிபெலஸ் (Cibeles) சதுக்கம் வரை அந்த அணிவகுப்புக் குழு மாட்ரிட் நகரின் வரலாற்றுச் சிறப்புமிக்க வீதிகள் வழியாகச் சென்றது.
அங்கு நடைபெற்ற விழாவில் சுமார் 1,20,000 பேர் கூடியிருந்ததாக அதிகாரிகள் உள்ளூர் ஊடகங்களிடம் தெரிவித்தனர்.
பொதுவெளியில் அமைக்கப்பட்டிருந்த மேடைக்கு வருவதற்கு முன்னதாக, வீரர்கள் ஒவ்வொருவராக அறிமுகப்படுத்தப்பட்டனர்.
அவர்கள் மேடைக்கு வரும்போது ஒலிக்கப்பட வேண்டிய பாடலை அவர்களே தேர்ந்தெடுத்திருந்தனர்.
தனது 25-வது பிறந்தநாளைக் கொண்டாடும் அலெக்ஸ் பேனா, உலகக் கிண்ணத்துடன் மேடைக்கு வந்தார்.
ஞாயிற்றுக்கிழமை நடந்த விருது வழங்கும் விழாவைப் போலவே, ஆனால் இப்போது உள்ளூர் ரசிகர்களின் முன்னிலையில், ஸ்பெய்ன் அணி முழுவதும் மீண்டும் கிண்ணத்தை தூக்கியதோடு விழா நிறைவடைந்தது.
பாடகிகளான ஐதானா, அனா மெனா மற்றும் லோலா இண்டிகோ ஆகியோர் பார்வையாளர்களையும் வீரர்களையும் விழவில் மகிழ்வித்தனர்.
