கண்டி, கட்டுகஸ்தோட்டை பிரதேசத்தில் ஐந்தாம் ஆண்டு புலமைப்பரிசில் பரீட்சையின் போது வினாத்தாளில் ஏற்பட்ட அசாதாரண சூழ்நிலை காரணமாகப் பாதிக்கப்பட்ட மாணவர்களுக்குத் தகுந்த நீதியை வழங்க அரசாங்கம் உடனடி நடவடிக்கை எடுக்க வேண்டும் என இலங்கை ஆசிரியர் சங்கம் கோரிக்கை விடுத்துள்ளது.
இது தொடர்பாக ஊடகவியலாளர் சந்திப்பை நடத்திய இலங்கை ஆசிரியர் சங்கத்தின் தலைவர் பிரியந்த பெர்னாண்டோ, மாணவர்களின் கல்வி எதிர்காலத்தைத் தீர்மானிக்கும் முக்கிய பரீட்சையான புலமைப்பரிசில் தேர்வில் இவ்வாறான சம்பவங்கள் இடம்பெறுவது மாணவர்களின் மனநிலையைப் பாதிக்கும் என்பதால், பாதிக்கப்பட்ட சிறுவர்களுக்கு நியாயம் கிடைப்பதை அரசாங்கம் உறுதி செய்ய வேண்டும் என வலியுறுத்தினார்.
இதனிடையே, க.பொ.த உயர்தரப் பரீட்சைக் கடமைகளில் ஈடுபடும் ஆசிரியர்களுக்கு வழங்கப்படும் கொடுப்பனவுகள் தற்போதைய வாழ்க்கைச் செலவுக்கு ஏற்ப போதுமானதாக இல்லை என்றும் அவர் சுட்டிக்காட்டினார். எனவே, பரீட்சைக் கடமைகளை மேற்கொள்ளும் ஆசிரியர்களின் பொறுப்புகள் மற்றும் தற்போதைய பொருளாதார நெருக்கடிகளைக் கருத்தில் கொண்டு, அவர்களுக்கு வழங்கப்படும் கொடுப்பனவுகளை உடனடியாக உயர்த்த அரசாங்கம் நடவடிக்கை எடுக்க வேண்டும் என்றும் பிரியந்த பெர்னாண்டோ மேலும் கோரிக்கை விடுத்தார்.
