ஜூரிச்சில் பறந்த இலங்கை கொடி; டயமண்ட் லீக் பட்டத்தை வென்றார் ரூமேஷ் தரங்க!

இலங்கையின் ரூமேஷ் தரங்க பத்திரகே, வியாழக்கிழமை நடைபெற்ற 2026 ஜூரிச் டைமண்ட் லீக் போட்டியில் (Zurich Diamond League 2026) ஈட்டி எறிதலில் 92.07 மீட்டர் தூரம் எறிந்து வெற்றி பெற்று, தனது சிறப்பான விளையாட்டுப் பருவத்தைத் தொடர்ந்தார்.

பொதுநலவாய விளையாட்டுப் போட்டிகளின் சாம்பியனான 23 வயதான அவர், லெட்ஸிகுரண்ட் மைதானத்தில் தனது ஆறாவது மற்றும் இறுதி முயற்சியில் வெற்றி எறிதலைச் செய்து, கிரெனடாவின் முன்னாள் உலக சாம்பியனான ஆண்டர்சன் பீட்டர்ஸை இலகுவாக முந்தினார்.

பீட்டர்ஸ் 86.93 மீட்டர் தூரத்தை எட்டி (இது இந்த சீசனில் அவரது சிறந்த செயல்பாடாகும்) இரண்டாம் இடத்தைப் பிடித்தார்.

அதேவேளையில், போலந்தின் டேவிட் வெக்னர் 85.16 மீட்டர் தூரத்துடன் தனது தனிப்பட்ட சிறந்த சாதனையைப் பதிவு செய்து மூன்றாம் இடத்தைப் பிடித்தார்.

ஜூன் மாதம் நடைபெற்ற ரோம் டைமண்ட் லீக் போட்டியில் 92.62 மீட்டர் தூரத்திற்கு ஈட்டி எறிந்து உலக அளவில் முன்னிலையில் இருந்தவராக இப்போட்டிக்கு வந்த ரூமேஷ் தரங்க, தனது முதல் முயற்சியில் 81.50 மீட்டர் தூரத்தைப் பதிவு செய்தார்.

பின்னர் இரண்டாவது சுற்றில் அதனை 88.23 மீட்டராக மேம்படுத்தினார்.

தனது மூன்றாவது முயற்சியில் 89.90 மீட்டர் தூரத்தைப் பதிவு செய்து, முதலிடத்தைத் தக்கவைப்பதில் தனது பிடியை மேலும் வலுப்படுத்திக்கொண்டார். 

அதனைத் தொடர்ந்து 84.91 மீட்டர் தூரத்தைப் பதிவு செய்த அவர், தனது ஐந்தாவது முயற்சியில் ‘ஃபவுல்’ (விதிமீறல்) செய்தார்.

வெற்றி ஏற்கனவே உறுதியாகிவிட்ட நிலையில், இறுதிச் சுற்றில் ஈட்டியை 92.07 மீட்டர் தூரத்திற்கு வீசி, தனது மிகச்சிறந்த திறனை வெளிப்படுத்தினார் தரங்கா.

இது அவரது விளையாட்டு வாழ்க்கையில் 92 மீட்டருக்கும் அதிகமான தூரத்திற்கு அவர் வீசிய இரண்டாவது முறையாகும்.

மேலும், இந்த சீசனின் தொடக்கத்தில் ரோமில் அவர் பதிவு செய்த தேசிய சாதனையும் உலக அளவில் அந்த ஆண்டின் சிறந்த சாதனையாகவும் விளங்கும் 92.62 மீட்டர் அளவை விட இது வெறும் 55 சென்டிமீட்டர் மட்டுமே குறைவாகும். 

அதேநேரம், பீட்டர்ஸ் தனது முதல் முயற்சியில் 86.93 மீட்டர் தூரம் எறிந்து ஆரம்பக்கட்ட முன்னிலையைப் பெற்றார்; ஆனால், அதன்பிறகு அவரால் அந்தத் தூரத்தை மேம்படுத்த முடியவில்லை. 

அவர் முறையே 82.17 மீ, 83.52 மீ, 84.22 மீ மற்றும் 82.08 மீ தூரங்களைப் பதிவு செய்ததோடு, தனது கடைசி முயற்சியில் ‘ஃபவுல்’ (விதிமீறல்) செய்தார்.

இதற்கிடையில், வெக்னர் ஐந்தாவது சுற்றில் 85.16 மீட்டர் தூரம் எறிந்து தனது சிறந்த செயல்பாட்டை வெளிப்படுத்தியதன் மூலம், பதக்க மேடையில் (முதல் மூன்று இடங்களுக்குள்) கடைசி இடத்தைப் பிடித்தார்.

டிரினிடாட் மற்றும் டொபாகோவைச் சேர்ந்த 2012 லண்டன் ஒலிம்பிக் சாம்பியனான கேஷோர்ன் வால்காட் 83.02 மீட்டர் தூரத்துடன் நான்காவது இடத்தைப் பிடித்தார்.

அதேவேளையில், கென்யாவின் ஜூலியஸ் யெகோ 81.66 மீட்டர் தூரத்துடன் ஐந்தாவது இடத்தைப் பிடித்தார்.

அமெரிக்கர்களான மார்க் அந்தோனி மினிசெல்லோ (80.38 மீ) மற்றும் கர்டிஸ் தாம்சன் (80.31 மீ) ஆகியோர் முறையே ஆறாவது மற்றும் ஏழாவது இடங்களைப் பிடித்தனர். 

2016 ரியோ ஒலிம்பிக் சாம்பியனான ஜெர்மனியின் தோமஸ் ரோஹ்லர் 79.86 மீட்டர் தூரத்துடன் எட்டாவது இடத்தைப் பிடித்தார்.

சுவிட்சர்லாந்தின் சைமன் விலாண்ட் (75.35 மீ) மற்றும் லாட்வியாவின் பேட்ரிக்ஸ் கைலும்ஸ் (74.30 மீ) ஆகியோர் இந்தப் போட்டியில் பங்கேற்ற 10 பேர் கொண்ட பட்டியலில் மற்ற இடங்களை நிரப்பினர்.

இந்த வெற்றியானது ரூமேஷ் தரங்காவின் சிறப்பான 2026-ஆம் ஆண்டுப் பயணத்தைத் தொடரச் செய்தது; அவர் இந்த ஆண்டில் பங்கேற்ற 12 போட்டிகளில் 11 இல் வெற்றி பெற்றுள்ளார், இதில் தொடர்ந்து ஆறு வெற்றிகளும் அடங்கும்.

ரோமில் 92.62 மீட்டர் தூரத்தை எறிந்து தேசிய சாதனை படைத்ததைத் தொடர்ந்து, ஆஸ்ட்ராவா மற்றும் தோஹா டயமண்ட் லீக் போட்டிகளிலும் ரூமேஷ் வெற்றி பெற்றார்.

பின்னர் கிளாஸ்கோவில் நடைபெற்ற பொதுநலவாய விளையாட்டுப் போட்டிகளில் 89.75 மீட்டர் தூரத்திற்கு ஈட்டி எறிந்து, அப்போட்டியில் சாம்பியன் பட்டம் வென்ற இலங்கையின் முதல் வீரர் என்ற பெருமையையும் பெற்றார்.

அதன்பிறகு, கடந்த வாரம் நடைபெற்ற லொசேன் டயமண்ட் லீக் போட்டியில் 88.14 மீட்டர் தூரத்திற்கு ஈட்டி எறிந்து, இந்தியாவின் நீரஜ் சோப்ராவை வெறும் ஒன்பது சென்டிமீட்டர் வித்தியாசத்தில் முந்தி வெற்றி பெற்ற ரூமேஷ் தரங்கா, பின்னர் சூரிச் நகரில் நடைபெற்ற போட்டியிலும் மீண்டும் 92 மீட்டர் தூர சாதனையை முறியடித்தார் என்பதும் குறிப்பிடத்தக்கது.