இலங்கை எல்லை மீற வேண்டாம்: தமிழக மீனவர்களுக்கு இந்திய உயர் நீதிமன்றம் அறிவுரை!

கச்சத்தீவுப் பகுதியில் மீன்பிடிப்பதற்காக இலங்கை எல்லைக்குள் நுழைவதைத் தவிர்க்குமாறு தமிழக மீனவர்களுக்கு விழிப்புணர்வு ஏற்படுத்தப்பட வேண்டும் என்று இந்திய உயர் நீதிமன்றம் செவ்வாய்க்கிழமை (06) வாய்மொழியாகக் குறிப்பிட்டது.

கச்சத்தீவு தீவை இலங்கைக்கு வழங்கிய நடவடிக்கை அரசியலமைப்புக்கு முரணானது என்று சவால் விடுத்த மனுக்கள் மீதான விசாரணையின்போதே நீதிமன்றம் இந்த விடயத்தைக் கூறியது.​​

மத்திய அரசின் தலைமை சட்டத்தரணியான ஆர்.வெங்கடரமணி, இப்பிரச்சினைகள் குறித்து அரசுக்கு முழுமையாகத் தெரியும் என்றும், அதற்கான உரிய நடவடிக்கைகளை அரசு மேற்கொள்ளும் என்றும் தெரிவித்ததைத் தொடர்ந்து, உயர் நீதிபதிகள் சஞ்சய் குமார் மற்றும் சஞ்சீவ் சச்சிதேவா ஆகியோர் அடங்கிய அமர்வு வழக்கின் விசாரணையை 2027 ஆம் ஆண்டு பெப்ரவரி மாதத்திற்கு ஒத்திவைத்தது.

1974 மற்றும் 1976-ஆம் ஆண்டு இந்திய-இலங்கை கடல்சார் ஒப்பந்தங்களின் விளக்கம் தொடர்பாக, நீங்கள் அந்த ஒப்பந்தம் குறித்து அவர்களிடம் (இலங்கையிடம்) பேசி வருகிறீர்களா? என்று தலைமை சட்டத்தரணியிடம் நீதிபதி குமார் வினவினார்.

இதற்குப் பதிலளித்த தலைமை சட்டத்தரணி, அரசு இதில் ஈடுபட விரும்பவில்லை. ஆரம்பத்தில் இதில் ஈடுபட்டிருந்தாலும், ஒரு கட்டத்தில் அதைக் கைவிட்டுவிட்டது, என்று கூறினார். 

மேலும், இலங்கையுடனான தனது மிகச் சிறந்த உறவைச் சிதைத்துக்கொள்ள இந்தியா விரும்பவில்லை என்றும் அவர் குறிப்பிட்டார்.

மீனவர்கள் சர்வதேச கடல் பகுதிக்குச் செல்வது குறித்துக் கருத்துத் தெரிவித்த அவர், கடல் மாசுபாடு காரணமாக இந்தியக் கடற்கரைப் பகுதிகளில் மீன் வளம் குறைந்துவிட்டதாகக் கூறப்படுவதைச் சுட்டிக்காட்டினார். 

அதேநரேம், தமிழகத்திற்கான மேலதிக அரசுத் தலைமை சட்டத்தரணி பிரசாந்தோ சந்திர சென், மீனவர்கள் நீர்நிலைகளை மாசுபடுத்தவில்லை என்று வாதிட்டு அவர்களுக்கு ஆதரவாகக் கருத்து தெரிவித்தார். 

இலங்கையில் சிறைபிடிக்கப்பட்டுள்ள 20 மீனவர்களை விரைவாக விடுவிக்க நடவடிக்கை எடுக்குமாறு மத்திய அரசுக்கு முதலமைச்சர் சி. ஜோசப் விஜய் அண்மையில் எழுதிய கடிதத்தைச் சுட்டிக்காட்டிய மேலதிக அரசுத் தலைமை சட்டத்தரணி ஹரிப்ரியா, இப்பிரச்சினைக்கு மத்திய அரசு இலங்கை தரப்புடன் பேசித் தீர்வு காண வேண்டும் என்றும் கூறினார்.

அந்த ஒப்பந்தத்திற்கு ஒப்புதல் அளிக்க, அரசியலமைப்பின் முதல் அட்டவணையில் திருத்தம் செய்வது அவசியம் என்று மூத்த சட்டத்தரணி பி. வில்சன் கூறினார்.

கைது நடவடிக்கைகள் தொடர்பாக ஏதேனும் நடவடிக்கை எடுக்கப்பட வேண்டும் என்று நீதிபதி குமார் வலியுறுத்தியதுடன், ஒரு குறிப்பிட்ட எல்லைக்கு அப்பால் செல்லக்கூடாது என்பது குறித்து மீனவர்களுக்கு விழிப்புணர்வு ஏற்படுத்தப்பட வேண்டும் என்றும் குறிப்பிட்டார்.