பாகிஸ்தானில் பயணிகளை ஏற்றிச்சென்ற பஸ்ஸொன்று விபத்துக்குள்ளானதில், அதில் பயணித்த குழந்தைகள், பெண்கள் உட்பட 28 பேர் உயிரிழந்துள்ளனர்.
பாகிஸ்தான்(Pakistan), கராச்சி நகரிலிருந்து, துர்பத் முதல் குவெட்டா(Quetta) நோக்கிச் சென்று கொண்டிருந்த குறித்த பஸ், வாசுக் (Washuk) நகருக்கு அருகே சாரதியின் கட்டுப்பாட்டை இழந்து, பள்ளத்தில் கவிழ்ந்து விபத்துக்குள்ளானதாக குறிப்பிடப்படுகின்றது.
இந்த விபத்தில், பஸ்ஸில் பயணித்த 28 பேர் உயிரிழந்துள்ளதுடன், மேலும் 22 பேர் காயமடைந்துள்ளதாகவும், அவர்கள் அருகிலுள்ள வைத்தியசாலையில் அனுமதிக்கப்பட்டுள்ளதாகவும் அந் நாட்டு செய்திகள் தெரிவிக்கின்றன.
பஸ்ஸின் அதிவேகம் காரணமாக இந்த விபத்துச் சம்பவம் இடம்பெற்றுள்ளதாக ஆரம்பக்கட்ட விசாரணைகளில் தெரியவந்துள்ளது.
எனினும், பஸ்ஸின் டயர் வெடித்ததினாலேயே விபத்து இடம்பெற்றுள்ளதாக, அந்நாட்டிலிருந்து வெளியாகும் சில ஊடக செய்திகள் தெரிவிக்கின்றன.
பாகிஸ்தானில், வீதி விபத்துக்கள் குறித்தான விதிமுறைகளை சரியாக பின்பற்றாமையினாலும், பாதுகாப்பு முன்னெச்சரிக்கைகளை போக்குவரத்துத் துறை கடைப்பிடிக்காததாலும் அதிகளவான வீதி விபத்துகள் பதிவாகி வருகின்றன.
அதன்படி, இந்த மே மாதத்தில் மட்டும் கடந்த 18ஆம் திகதி இடம்பெற்ற விபத்தில் 13 பேரும், கடந்த 3 ஆம் திகதி பதிவான விபத்தில் 20 பேர் உயிரிழந்துள்ளமை குறிப்பிடத்தக்கது.
