மகளுக்குக் கழிவறைத் தொற்று நீக்கியைப் பருகக் கொடுத்த தந்தை!

ஹுங்கம, படாட பிரதேசத்தில் 6 வயது மகளுக்கு கழிவறையைச் சுத்தம் செய்யும் திரவத்தைக் குடிப்பதற்கு கொடுத்த தந்தை கைது செய்யப்பட்டுள்ளார்.

வெளிநாட்டில் பணியாற்றும் தனது மனைவி பணம் அனுப்பாததால் கோபமடைந்த குறித்த நபர், தனது மனைவி மற்றும் குடும்ப உறுப்பினர்களை அச்சுறுத்துவதற்காக தனது 6 வயது மகளுக்கு கழிவறையை சுத்தம் செய்யும் திரவத்தைக் குடிப்பதற்கு கொடுக்க முயன்றதாகத் தெரிவிக்கப்படுகிறது.

இதுதொடர்பாக பொலிஸ் அவசர தொலைபேசி இலக்கத்துக்குக் கிடைத்த தகவலின் பேரில் மேற்கொள்ளப்பட்ட விசாரணையின்போதே குறித்த சந்தேக நபர் கைது செய்யப்பட்டுள்ளார்.

குறித்த சந்தேக நபர் ஹுங்கம படாட பிரதேசத்தில் வசிக்கும் கூழி தொழிலாளி எனவும் பொலிஸார் தெரிவித்துள்ளனர்.

சந்தேகநபர் கைதுசெய்யப்பட்ட போது அவர் அதீத மதுபோதையில் இருந்ததாகவும் பொலிஸார் தெரிவித்துள்ளனர்.

இதேவேளை கழிவறை சுத்தம் செய்யும் திரவத்தை பருகிய சிறுமி தற்போது ஹம்பாந்தோட்டை பொது வைத்தியசாலையில் சிகிச்சைகளுக்காக அனுமதிக்கப்பட்டுள்ளதாகவும் பொலிஸார் தெரிவித்துள்ளனர்.
இது தொடர்பான மேலதிக விசாரணைகளை ஹூங்கம பொலிஸார் மேற்கொண்டு வருகின்றனர்.