வட மாகாணம் மற்றும் மட்டக்களப்பு மாவட்டத்தில் வேலையற்ற பட்டதாரிகளுக்கு உடனடியாக உரிய தீர்வொன்றை வழங்க அரசாங்கம் நடவடிக்கை எடுக்க வேண்டும் என்று எதிர்க்கட்சித் தலைவர் சஜித் பிரேமதாஸ, இன்று சபையில் வலியுறுத்தினார்.
இது குறித்து அவர் மேலும் தெரிவித்துள்ளதாவது” மாகாண மட்டத்தில் ஆசிரியர்களை ஆட்சேர்ப்பு செய்வதில் குழப்பமான நிலை நிலவிவருகின்றது.
குறிப்பாக மாகாண மட்டத்தில் இடம்பெறும் ஆட்சேர்ப்புகளை குழப்பமான முறையிலும் முறைசாரா முறையிலும் மேற்கொண்டு பட்டதாரிகளுக்கு அவநம்பிக்கையை ஏற்படுத்தும் விதமாக அரசாங்கம் செயற்படுகின்றது.
இந்த விடயத்தில் உரிய தரப்பினர் பொறுப்புணர்வுடனும் நடந்து கொள்ள வேண்டும். கடந்த சில தினங்களுக்கு முன்னர் வடக்கு, கிழக்கு மாகாணங்களுக்கு நான் மேற்கொண்ட விஜயத்தின் போது மட்டக்களப்பு மாவட்டத்தில் வேலையற்ற பட்டதாரிகள் தாம் எதிர்நோக்கி வரும் பிரச்சினைகளை என்னிடம் முன்வைத்தனர்.
போராட்டத்தில் ஈடுபட்டுள்ள இவர்களுடன் கலந்துரையாடிய போது, வேலையற்ற பட்டதாரிகளுக்கு அரசாங்கம் கடைப்பிடிக்கும் கொள்கைகள் குறித்து அவர்கள் கேள்வி எழுப்பினர்.
இந்த பட்டதாரிகள் கொண்டுள்ள தகைமையின் பிரகாரம், அரசாங்கத்தின் அத்தியாவசிய வெற்றிடங்களுக்கு ஏன் ஆட்சேர்ப்பு செய்யப்படுவதில்லை என கேள்வி எழுப்புகிறேன். வட மாகாணம் மற்றும் மட்டக்களப்பு மாவட்ட பட்டதாரிகள் முன்வைத்த கோரிக்கைகளை சபையில் சமர்ப்பிர்க்கிறேன்.
இது குறித்து ஆராய்ந்து அரசாங்கத்தின் கொள்கையை தெரிவியுங்கள். கிட்டத்தட்ட 50 ஆயிரம் வேலையற்ற பட்டதாரிகள் இருப்பதால் அவர்களுக்கும் உரிய தீர்வுகளை வழங்க வேண்டும்” இவ்வாறு எதிர்க்கட்சித் தலைவர் சஜித் பிரேமதாஸ தெரிவித்துள்ளார்.
