பங்களாதேஷ் போராட்டக்காரர்கள் அந்நாட்டு உயர் நீதிமன்றத்தை சுற்றி வளைத்ததை அடுத்து, தலைமை நீதிபதி பதவி விலகியுள்ளார்.
பங்களாதேஷத்தில் இடஒதுக்கீட்டிற்கு எதிராக நடைபெற்ற மாணவர்கள் போராட்டம் பிரதமராக இருந்த ஷேக் ஹசீனா தலைமையிலான அவாமி லீக் அரசாங்கத்திற்கு எதிராக திரும்பியதை அடுத்து, பிரதமர் பதவியை இராஜினாமா செய்த ஷேக் ஹசீனா இந்தியாவில் தற்போது தஞ்சமடைந்துள்ளார்.
இதனை அடுத்து, அந்நாட்டு நாடாளுமன்றம் கலைக்கப்பட்டு இடைக்கால அரசாங்கம் அமைக்கப்பட்டுள்ளது. நோபல் பரிசு பெற்ற பொருளாதார நிபுணர் முகமது யூனிஸ் வங்காளதேச இடைக்கால அரசாங்கத்தின் தலைவராக நியமிக்கப்பட்டுள்ளார்.
இந்த நிலையில், பங்களாதேஷ் உயர்நீதிமன்ற தலைமை நீதிபதி ஒபைதுல் ஹசன் அவாமி லீக் கட்சிக்கு ஆதரவான நிலைப்பாட்டை கொண்டவர் என மாணவர் அமைப்புகள் குற்றஞ்சாட்டியிருந்தன.
மேலும், புதிய இடைக்கால அரசாங்கம் சட்டவிரோதமானது என உயர்நீதிமன்றம் தீர்ப்பளிக்கலாம் என்றும் தகவல்கள் பரவியிருந்தன. இதனால், தலைமை நீதிபதி பதவி விலக வேண்டும் என்றும் இல்லையென்றால் அவரது வீட்டை சூறையாடுவோம் என்றும் போராட்டக்காரர்கள் எச்சரிக்கை விடுத்தனர்.
அத்தோடு, நூற்றுக்கணக்கான போராட்டக்காரர்கள் உயர் நீதிமன்றத்தை முற்றுகையிட்டு ஒருமணி நேரத்தில் தலைமை நீதிபதி ஹசன் பதவி விலக வேண்டுமென எச்சரிக்கை விடுத்தனர்.
இதையடுத்து, தலைமை நீதிபதி ஹசன் தனது பதவியை இராஜினாமா செய்துள்ளார்.
பதவி விலகல் கடிதத்தை அவர் சட்ட அமைச்சகத்திற்கு அனுப்பி வைத்துள்ளார் என்றும் தெரிவிக்கப்பட்டுள்ளது.
உயர் நீதிமன்ற நீதிபதிகள் மற்றும் நாட்டின் பிற நீதிமன்றங்களில் உள்ள நீதிபதிகளின் பாதுகாப்பை கருத்தில் கொண்டு தலைமை நீதிபதி பதவில் இருந்து விலகுவதாக ஹசன் தெரிவித்துள்ளார் என்பது குறிப்பிடத்தக்கது.
