பிரித்தானியாவின் மிகவும் பிரபலமான சுற்றுலாத் தலங்களின் பட்டியலில், லண்டன் இயற்கை வரலாற்று அருங்காட்சியகம் (Natural History Museum) முதலிடத்தைப் பிடித்துப் புதிய சாதனை படைத்துள்ளது.
2025-ஆம் ஆண்டில் பிரித்தானியாவின் அதிக பார்வையாளர்களைக் கவர்ந்த சுற்றுலாத் தலமாக லண்டனின் சவுத் கென்சிங்டனில் உள்ள இயற்கை வரலாற்று அருங்காட்சியகம் உருவெடுத்துள்ளது.
கடந்த 12 மாதங்களில் சுமார் 7.1 மில்லியன் மக்கள் இந்த அருங்காட்சியகத்தைப் பார்வையிட்டுள்ளனர்.
இது முந்தைய ஆண்டை விட 13 சதவீத வளர்ச்சியாகும்.
இதன் மூலம், கடந்த இரண்டு ஆண்டுகளாக முதலிடத்தில் இருந்த பிரிட்டிஷ் அருங்காட்சியகத்தைப் பின் தள்ளி, இந்த அருங்காட்சியகம் முதல் முறையாகச் சாதனையைத் தன்வசப்படுத்தியுள்ளது.
அதன்படி, முன்னணி சுற்றுலாத் தலங்களின் சங்கமான ‘அல்வா’ (ALVA) வெளியிட்டுள்ள பட்டியலில் முதல் ஐந்து இடங்களில்
1. இயற்கை வரலாற்று அருங்காட்சியகம் (Natural History Museum)
2. பிரிட்டிஷ் அருங்காட்சியகம் (British Museum)
3. வின்ட்சர் கிரேட் பார்க் (Windsor Great Park)
4. டேட் மாடர்ன் (Tate Modern)
5. தேசிய கலைக்கூட அரங்கம் (National Gallery) என்பன காணப்படுகின்றன.
வாழ்க்கைச் செலவு அதிகரிப்பு மற்றும் பொருளாதார சவால்களுக்கு மத்தியிலும், மக்கள் தங்களின் ஓய்வு நேரத்தைச் செலவிட கலாச்சார மற்றும் வரலாற்றுத் தலங்களையே அதிகம் விரும்புகின்றனர் என்பதை இந்தத் தரவுகள் காட்டுகின்றன.
2025-ஆம் ஆண்டில் பிரித்தானியாவில் உள்ள 409 முக்கிய சுற்றுலாத் தலங்களுக்குச் சுமார் 165 மில்லியன் மக்கள் வருகை தந்துள்ளனர்.
இது முந்தைய ஆண்டை விட 2 சதவீத வளர்ச்சியாக இருந்தாலும், கொரோனா காலத்திற்கு முந்தைய (2019) நிலையை விட இன்னும் சற்றே குறைவாகவே உள்ளது.
லண்டனுக்கு வெளியே, இங்கிலாந்தின் வடமேற்குப் பகுதியில் 11.3 சதவீதமும், கிழக்கு மிட்லாண்ட்ஸ் பகுதியில் 7.5 சதவீதமும் பார்வையாளர்களின் வருகை அதிகரித்துள்ளது.
ஸ்காட்லாந்தில் 2.6 சதவீதமும், வேல்ஸில் 0.9 சதவீதமும் வளர்ச்சி பதிவாகியுள்ளது.
குறிப்பாக, நாடாளுமன்றக் கட்டடம் 47 சதவீத வளர்ச்சியுடன் 8 இலட்சத்து 23,000 பார்வையாளர்களை ஈர்த்துள்ளது.
இந்நிலையில் எதிர்வரும் செப்டம்பர் மாதம் முதல் பிரிட்டிஷ் அருங்காட்சியகத்தில் ‘பேயக்ஸ் டேபெஸ்ட்ரி’ (Bayeux Tapestry) காட்சிப்படுத்தப்படவுள்ளதால், அடுத்த ஆண்டு மீண்டும் கடும் போட்டி நிலவும் என எதிர்பார்க்கப்படுகிறது.
