தனது உடல் எடையைக் குறைத்து “டேட் பாட்” (Dad bod) தோற்றத்திலிருந்து கட்டுமஸ்தான உடலமைப்பிற்கு மாறிய ஒரு இளைஞரின் புகைப்படங்களை, ஒரு பிரபல சுகாதார நிறுவனம் தனது விளம்பரத்திற்காகத் திருடிப் பயன்படுத்திய சம்பவம் பரபரப்பை ஏற்படுத்தியுள்ளது.
வேல்ஸ் நாட்டைச் சேர்ந்த 38 வயதுடைய சியோன் மோண்டி (Sion Monty), தனது மகன் பிறந்த பின்னர் சுமார் 31 கிலோ உடல் எடை அதிகரித்திருந்த நிலையில் பின்னர் கடும் உடற்பயிற்சி மூலம் தனது எடையைக் குறைத்து, அந்த மாற்றத்தை இன்ஸ்டாகிராமில் பதிவிட்டுள்ளார்.
இதனை சுமார் 2,40,000 ரசிகர்கள் பின்தொடர்கின்றனர்.
இந்நிலையில், ஒரு பிரபல நிறுவனம், சியோனின் அனுமதியின்றி அவரது புகைப்படங்களைத் தனது ஆரோக்கியத் திட்டத்தை விளம்பரப்படுத்தப் பயன்படுத்தியுள்ளது.
மேலும், அந்த நிறுவனத்தின் பயிற்றுவிப்பாளர் ஒருவர்தான் சியோனுக்குப் பயிற்சி அளித்தார் எனப் பொய்யான தகவலையும் பரப்பியுள்ளது.
இந்நிலையில் இதுகுறித்து கருத்து தெரிவித்த சியோன் , ஒரு நிறுவனம் எனது புகைப்படத்தைத் திருடித் தனது திட்டங்களை விற்பனை செய்வது, மிகவும் வருத்தமளிப்பதாக தெரிவித்தார், இந்நிலையில் குறித்த நிறுவனம் அந்தப் புகைப்படங்களை நீக்கி சியோனிடம் மன்னிப்பு கோரியுள்ளது.
இதேவேளை, தவறான புகைப்படங்களை வழங்கிய அந்தப் பயிற்றுவிப்பாளரும் பணியிலிருந்து நீக்கப்பட்டுள்ளதாகவும் தெரிவித்துள்ளது.
