பிரித்தானியப் பிரதமர் கீர் ஸ்டார்மருக்கு (Sir Keir Starmer) எதிராக அவரது சொந்தக் கட்சியினரே தலைமைத்துவப் போட்டியை நோக்கி நகர்ந்து வரும் சூழலில், இப்போட்டியில் அவர் போட்டியிடுவதா இல்லையா என்பது அவரது “தனிப்பட்ட முடிவு” (Personal decision) எனப் பிரித்தானிய கலாசார அமைச்சர் லிசா நந்தி (Lisa Nandy) தெரிவித்துள்ளார்.
இங்கிலாந்து ஊடகமொன்றுக்கு வழங்கிய பிரத்தியேக செவ்வியில் அவர் இதனை தெரிவித்தார்.
கடந்த சில நாட்களாக பிரதமர் கீர் ஸ்டார்மர் பதவி விலக வேண்டும் என்ற கோரிக்கைகள் தொழிற்கட்சிக்குள் தீவிரமடைந்துள்ளன.
இந்நிலையில் அவரது சொந்தக் கட்சியைச் சேர்ந்த சுமார் 90 நாடாளுமன்ற உறுப்பினர்கள் (MPs) அவரைப் பதவி விலகுமாறு வலியுறுத்தியுள்ளதுடன், ஐந்து அமைச்சர்கள் தங்களது பதவிகளை ராஜினாமா செய்துள்ளனர்.
எனினும், பிரதமர் ஸ்டார்மர் பதவி விலக மறுத்து, இந்த அழுத்தங்களை எதிர்த்துவருகின்றமை குறிப்பிடத்தக்கது.
