மத்திய கிழக்கு ஆப்பிரிக்க நாடான கொங்கோவில் (Congo) எபோலா வைரஸ் தீவிரமாகப் பரவி வரும் நிலையில், கொங்கோ நாட்டைச் சேர்ந்த பயணி ஒருவர் இருந்த காரணத்தினால் ‘ஏர் பிரான்ஸ்’ (Air France) விமானம் அமெரிக்காவில் தரையிறங்க அனுமதி மறுக்கப்பட்டு, அவசரமாகக் கனடாவுக்குத் திருப்பி விடப்பட்டுள்ளது.
கொங்கோவில் எபோலா வைரஸ் தாக்கத்தினால் இதுவரை 140-க்கும் மேற்பட்டோர் உயிரிழந்துள்ளனர்.
வைரஸ் பரவலைத் தடுக்கும் பொருட்டு கொங்கோ உள்ளிட்ட சில ஆப்பிரிக்க நாடுகளில் இருந்து அமெரிக்காவுக்கு வரும் பயணிகளுக்கு அந்நாட்டு அரசு கடுமையான கட்டுப்பாடுகளை விதித்துள்ளது.
புதிய விதிகளின்படி, கொங்கோவைச் சேர்ந்தவர்களோ அல்லது அமெரிக்கக் குடியுரிமை பெற்ற கொங்கோ நாட்டினரோ அமெரிக்காவிற்குள் நுழைய வேண்டுமென்றால், அவர்கள் கண்டிப்பாக வாஷிங்டன் விமான நிலையம் வழியாக மட்டுமே அனுமதிக்கப்படுவர் எனத் தெரிவிக்கப்பட்டிருந்தது.
அங்கு அவர்களுக்குப் பிரத்யேக மருத்துவப் பரிசோதனைகள் மேற்கொள்ளப்படுவதே இதற்கு முக்கிய காரணமாகும்.
இவ்வாறான சூழலில், பிரான்ஸ் தலைநகர் பாரிஸிலிருந்து 100-க்கும் மேற்பட்ட பயணிகளுடன் அமெரிக்காவின் மிச்சிகன் (Michigan) மாகாணம் நோக்கி ஏர் பிரான்ஸ் விமானம் ஒன்று இன்று புறப்பட்டது.
விமானம் நடுவானில் பறந்து கொண்டிருந்த போது, அதில் கொங்கோ நாட்டைச் சேர்ந்த பயணி ஒருவர் இருப்பது கண்டறியப்பட்டது.
மிச்சிகன் விமான நிலையத்தில் எபோலா பரிசோதனைக்கான சிறப்பு வசதிகள் இல்லாததாலும், வாஷிங்டன் வழியாக மட்டுமே வர வேண்டும் என்ற விதியை அந்தப் பயணி மீறியதாலும், மிச்சிகனில் தரையிறங்க அந்த விமானத்திற்கு அமெரிக்க அதிகாரிகள் திடீரென அனுமதி மறுத்தனர்.
இதனைத் தொடர்ந்து, ஏர் பிரான்ஸ் விமானம் உடனடியாக அண்டை நாடான கனடாவுக்குத் திருப்பி விடப்பட்டு, அங்குள்ள மாண்ட்ரியல் (Montreal) நகரில் பாதுகாப்பாகத் தரையிறக்கப்பட்டது.
விமானம் தரையிறங்கியதும் கனடா மருத்துவக் குழுவினர் அந்த கொங்கோ பயணியை விமானத்தில் இருந்து இறக்கி தீவிர மருத்துவப் பரிசோதனைக்கு உட்படுத்தினர்.
அத்துடன் அவர் தற்சமயம் தனிமைப்படுத்தப்பட்டு மருத்துவக் கண்காணிப்பில் வைக்கப்பட்டுள்ளார்.
குறித்த கொங்கோ பயணியிடம் எபோலா வைரஸ் அறிகுறிகள் ஏதேனும் உள்ளதா என்பது குறித்துக் கண்காணிக்கப்பட்டு வரும் நிலையில், விமானத்தில் இருந்த ஏனைய 100-க்கும் மேற்பட்ட பயணிகள் அனைவரும் அதே ஏர் பிரான்ஸ் விமானம் மூலம் கனடாவிலிருந்து தங்களது இலக்கான அமெரிக்காவின் மிச்சிகன் மாகாணத்திற்குப் புறப்பட்டுச் சென்றனர்.
இச்சம்பவம் சர்வதேச விமானப் போக்குவரத்து வட்டாரத்தில் பெரும் பரபரப்பை ஏற்படுத்தியுள்ளது.
