இங்கிலாந்தின் பிரபல ‘வெஸ்ட் ஹாம்’ (West Ham) கால்பந்து கிளப்பின் இணை உரிமையாளரான டேவிட் சல்லிவன் மீது எழுந்துள்ள பாலியல் துஸ்பிரயோக குற்றச்சாட்டுகள் குறித்து, ‘சுயாதீன கால்பந்து ஒழுங்குமுறை ஆணையம்’ அவசர மற்றும் தீவிர விசாரணைகளை ஆரம்பித்துள்ளது.
சல்லிவனுக்குச் சொந்தமான ‘டெய்லி ஸ்போர்ட்’ நாளிதழ்களில் மாடலிங் வேலை தேடி வந்த, 18 முதல் 20 வயதுக்குட்பட்ட பல இளம் பெண்கள், சல்லிவன் தனது அதிகாரத்தைத் துஷ்பிரயோகம் செய்து தங்களைப் பாலியல் ரீதியாகப் பயன்படுத்திக் கொண்டதாகக் குற்றம் சாட்டியுள்ளனர்.
இந்தக் கடுமையான குற்றச்சாட்டுகள் ஊடகங்களில் வெளியாவதற்கு முன்னதாக, கடந்த வார இறுதியில் டேவிட் சல்லிவன் வெஸ்ட் ஹாம் கால்பந்து கிளப்பின் இணைத் தலைவர் பதவியிலிருந்து ராஜினாமா செய்தார்.
வெஸ்ட் ஹாம் கிளப் வெளியிட்டுள்ள அறிக்கையில், சல்லிவன் தன் மீதான சட்டவிரோதக் குற்றச்சாட்டுகளை மறுத்துள்ளதாகவும், கிளப்பின் செயல்பாடுகளுக்குப் பாதிப்பு ஏற்படக் கூடாது என்பதற்காகவே விலகியுள்ளார் என்றும் குறிப்பிடப்பட்டுள்ளது.
கடந்த 16 ஆண்டுகளாக வெஸ்ட் ஹாம் கிளப்பின் இணைத் தலைவராக இருந்த 77 வயதான டேவிட் சல்லிவனுக்கு எதிராக எழுந்துள்ள இந்த விவகாரம், இங்கிலாந்து விளையாட்டு வட்டாரத்தில் பெரும் சர்ச்சையை ஏற்படுத்தியுள்ளது.
