கண்டி, தெல்தெனியவில் சந்தேகத்திற்கிடமான சூழ்நிலையில் சடலமாகக் கண்டெடுக்கப்பட்ட அம்பாறை வைத்தியசாலையைச் சேர்ந்த பிசியோதெரபியின் (physiotherapist) மரணம், கழுத்தை நெரித்ததால் ஏற்பட்ட கொலை என்பது பிரேதப் பரிசோதனை மூலம் உறுதிப்படுத்தப்பட்டுள்ளது.
ஜூன் 17 அன்று தெல்தெனிய வைத்தியசாலைக்கு அருகில் நிறுத்தப்பட்டிருந்த கார் ஒன்றிற்குள் 33 வயதுடைய பெண்ணொருவரின் சடலம் கண்டெடுக்கப்பட்டது.
இச்சம்பவம் நாட்டை அதிர்ச்சியில் ஆழ்த்தியது.
இறப்பு குறித்த சந்தேகங்களைத் தொடர்ந்து, பொலிஸார் விரிவான விசாரணையைத் தொடங்கினர்.
இதன் விளைவாக, வலான மத்திய குற்றத் தடுப்புப் பிரிவு அதிகாரிகள், முக்கிய சந்தேக நபரையும் அவரது மனைவி மற்றும் குழந்தையையும் நேற்று (24) அதிகாலையில் யாழ்ப்பாணம், சாவகச்சேரியில் பேருந்தில் பயணித்துக் கொண்டிருந்தபோது கைது செய்யப்பட்டனர்.
கைது செய்யப்பட்ட சந்தேகநபர் 43 வயதுடையவர் எனவும், சந்தேகநபரான பெண் 35 வயதுடையவர் எனவும் தெரிவிக்கப்பட்டுள்ளது. இருவரும் கண்டி – பல்லேகலே பகுதியைச் சேர்ந்தவர்கள் ஆவர் என்றும் அடையாளம் காணப்பட்டனர்.
சந்தேகநபர் தொடர்பாக மேற்கொள்ளப்பட்ட மேலதிக விசாரணையில் பல முந்தைய மோசடி சம்பவங்கள் தொடர்பான வழக்குகள் நிலுவையில் இருப்பது தெரியவந்தது.
அதேநேரம், தனிப்பட்ட முறையில், முக்கிய சந்தேக நபர் தலைமறைவாகியிருப்பதற்கு உதவியதாகக் கூறப்படும் குற்றச்சாட்டின் பேரில், ராஜவெல்லவைச் சேர்ந்த 49 வயதுடைய நபர் ஒருவரை நுவரெலியா பிரிவு குற்றப் புலனாய்வுப் பிரிவினர் கைது செய்தனர்.
மேலதிக விசாரணைகளுக்காக சந்தேக நபர்கள் அனைவரும் நேற்று இரவு (24) நுவரெலியா பொலிஸ் நிலையத்தில் ஒப்படைக்கப்பட்டதாகக் பொலிஸார் தெரிவித்தனர்.
பாதிக்கப்பட்ட நபர் வெலிகமவைச் சேர்ந்தவர் என்றும், அவர் ஜூன் 3 முதல் ஜூன் 16 வரை நுவரெலியாவில் உள்ள ஒரு விடுதியில் தங்கியிருந்தார் என்றும் விசாரணையில் தெரியவந்துள்ளது.
பாதிக்கப்பட்டவரின் உடலை ஹோட்டல் அறையிலிருந்து சந்தேகநபர் வெளியே கொண்டு செல்வதைக் காட்டும் சிசிடிவி (CCTV) காட்சிகள் ஊடகங்களில் வெளியானதைத் தொடர்ந்து, பொலிஸார் இது குறித்து மேலதிக விசாரணைகளை மேற்கொண்டனர்.
பொலிஸ்மா அதிபர் பிரியந்த வீரசூரியவின் அறிவுறுத்தலின் பேரில், குற்றப் புலனாய்வுத் துறையின் தொழில்நுட்ப உதவியுடன் ஏழு நாட்களாக மேற்கொள்ளப்பட்ட தேடுதல் வேட்டைக்குப் பின்னர் முக்கிய சந்தேகநபர் இறுதியில் கைது செய்யப்பட்டார்.
எனினும், விசாரணையின்போது, தான் ஹோட்டல் அறைக்குள் சென்றபோதே பாதிக்கப்பட்டவர் ஏற்கனவே தூக்கில் தொங்கிய நிலையில் இருந்ததாகவும், அதனால் பதட்டமடைந்த தான் அந்த உடலை வாகனத்தில் தெல்தெனியவுக்கு எடுத்துச் சென்றதாகவும் சந்தேகநபர் கூறினார்.
