கட்டாய உழைப்பு முறையைத் தடுப்பதில் உரிய நடவடிக்கை எடுக்கத் தவறியதாகக் கூறப்படும் குற்றச்சாட்டுகளின் அடிப்படையில், அமெரிக்கா தனது இறக்குமதியில் பெரும்பகுதியை உள்ளடக்கிய சுமார் 60 வர்த்தகப் பங்காளிகள் மீது புதிய வரிகளை விதிக்கிறது.
10% முதல் 12.5% வரை உள்ள இந்த வரிகள், இங்கிலாந்து, சீனா, ஐரோப்பிய ஒன்றியம், கனடா, ஜப்பான், இலங்கை மற்றும் இந்தியா உள்ளிட்ட முக்கியப் பொருளாதாரக் கூட்டாளிகளை இலக்காகக் கொண்டுள்ளன.
இந்த ஆண்டின் தொடக்கத்தில் வெளிநாட்டுப் பொருட்கள் மீது விதிக்கப்பட்ட தற்காலிக 10% வரி முடிவுக்கு வருவதைத் தொடர்ந்து, வெள்ளிக்கிழமை (24) முதல் இவை அமுலுக்கு வருகின்றன.
அமெரிக்க ஜனாதிபதி டொனால்ட் ட்ரம்ப் கடந்த ஆண்டு மீண்டும் பதவியேற்றபோது மீண்டும் தூண்டிவிடப்பட்ட உலகளாவிய வர்த்தகப் போரில், இந்த நடவடிக்கை மிக அண்மைய தீவிரமடைதலாகும்.
அவசரகால அதிகாரங்களின் கீழ் உலகளவில் விதிக்கப்பட்ட பல வரிகள் சட்டவிரோதமாகவே அமுல்படுத்தப்பட்டன என்று அமெரிக்க உயர் நீதிமன்றம் இந்த ஆண்டின் தொடக்கத்தில் தீர்ப்பளித்தது.
எனவே, ஜனாதிபதி தனது முக்கிய வர்த்தகக் கொள்கையை முன்னெடுத்துச் செல்ல வேறு சட்டரீதியான வழிகளை நாடியுள்ளார்.
கட்டாய உழைப்பு முறையை ஒழிப்பதில் போதுமான நடவடிக்கைகள் எடுக்கப்படவில்லை என்ற கவலைகளின் அடிப்படையில், டஜன் கணக்கான நாடுகளிலிருந்து அமெரிக்காவிற்கு இறக்குமதி செய்யப்படும் சரக்குகள் மீது 10 முதல் 12.5 சதவீதம் வரையிலான வரி விதிப்புகளை வெள்ளை மாளிகை முதன்முதலில் கடந்த மாதம்தான் முன்மொழிந்தது.
ட்ரம்பின் உத்தரவின் பேரில் செயல்படும் அமெரிக்க வர்த்தகப் பிரதிநிதி ஜேமிசன் கிரீர், அந்த வரிகள் இனி நடைமுறைக்கு வரும் என்று வியாழக்கிழமை (23) தெரிவித்தார்.
அமெரிக்க வர்த்தகத்திற்குச் சுமையாகவோ அல்லது தடையாகவோ இருக்கும் நடைமுறைகள் மீதான அமெரிக்க வர்த்தக அமுலாக்கத்தை நிர்வகிக்கும் 1974 ஆம் ஆண்டு வர்த்தகச் சட்டத்தின் 301 ஆம் பிரிவை கிரீர் மேற்கோள் காட்டினார்.
இந்த வாரத் தொடக்கத்தில், கனடாவிலிருந்து இறக்குமதி செய்யப்படும் பொருட்கள் மீது 50% சுங்க வரியை விதிப்பதற்காக, ட்ரம்ப் நிர்வாகம் 1930-ஆம் ஆண்டின் சுங்க வரிச் சட்டத்தின் (Tariff Act of 1930) பிரிவு 338-ஐப் பயன்படுத்தியது.
இந்த நிலையில், கட்டாய உழைப்பைக் கொண்டு உற்பத்தி செய்யப்பட்ட சரக்குகளின் இறக்குமதிக்குத் தடையை விதிக்கவும், அதைத் திறம்படச் செயல்படுத்தவும் தவறிய” வர்த்தகப் பங்காளிகள் மீது சமீபத்திய வரிகள் விதிக்கப்படுவதாக அமெரிக்க வர்த்தகப் பிரதிநிதி அலுவலகம் வியாழக்கிழமை தெரிவித்தது.
அமெரிக்காவின் மொத்த இறக்குமதியில் 99.4 சதவீதத்தைப் பிரதிநிதித்துவப்படுத்தும் முக்கிய 60 வர்த்தகப் பங்காளிகள் மீது இந்த புதிய வரிகள் விதிக்கப்படுகின்றன என்றும் அது மேலும் குறிப்பிட்டது.
