ஆறாவது மாதத்தில் நுழைந்துள்ள போரை முடிவுக்குக் கொண்டு வருவதற்கான ஒரு உடன்பாட்டை எட்டுவதற்காக, இஸ்லாமியக் குடியரசான ஈரான் மீது தாக்குதல் நடத்தும் நடவடிக்கையைத் தற்காலிகமாக நிறுத்திவைக்க முடிவு செய்துள்ள அமெரிக்க ஜனாதிபதி டொனால்ட் ட்ரம்ப், தெஹ்ரானுடன் புதிய பேச்சுவார்த்தைகள் திங்கட்கிழமை (03) தொடங்கும் என்று கூறியுள்ளார்.
இந்தச் பேச்சுவார்த்தைகளில் ஹார்முஸ் நீரிணை (உலகளாவிய எரிசக்தி விநியோகத்திற்கான ஒரு வழித்தடமாகவும், இமோதலில் ஒரு முக்கிய முரண்பாட்டுப் புள்ளியாகவும் இது மாறியுள்ளது) குறித்தும், இறுதியாக ஈரானின் அணு ஆயுத ஒழிப்பு குறித்தும் விவாதிக்கப்படும் என்று ட்ரம்ப் ஞாயிற்றுக்கிழமை (02) செய்தியாளர்களிடம் கூறினார்.
அந்த முக்கிய நீரிணைப் பாதையில் ஞாயிற்றுக்கிழமையன்று ஒரு கப்பலுக்கு அருகே வெடிப்புச் சம்பவம் ஒன்று நிகழ்ந்த நிலையில், அப்பகுதியின் நிலையற்ற தன்மை மீண்டும் வெளிப்பட்டுள்ளது.
இதற்கிடையில், அந்த நீரிணை வழியாகச் செல்லும் புதிய வழித்தடம் குறித்து ஓமனுடன் ஒரு ஒப்பந்தத்தை மேற்கொள்ளும் நிலையை நெருங்கியுள்ளதாக ஈரான் தெரிவித்துள்ளது.
பெப்ரவரி 28 அன்று அமெரிக்காவும் இஸ்ரேலும் ஈரான் மீது திடீர் தாக்குதல்களை நடத்தியதிலிருந்து வொஷிங்டனுக்கும் தெஹ்ரானுக்கும் இடையே போர் நிலவி வருகிறது.
இருப்பினும், அவ்வப்போது நடைபெற்ற இராஜதந்திர முயற்சிகள் காரணமாக அவ்வப்போது ஓரளவுக்கு அமைதியான சூழலும் நிலவியது.
போரைத் தீவிரப்படுத்துவதாக ட்ரம்ப் பலமுறை அச்சுறுத்தியிருந்தாலும், பேச்சுவார்த்தைகளுக்கு மேலும் கால அவகாசம் அளிக்கும் வகையிலேயே அவர் செயல்பட்டு வந்துள்ளார்.
கடந்த மாதம் மீண்டும் தாக்குதல்கள் தொடங்கியதைத் தொடர்ந்து, சண்டை மீண்டும் தீவிரமடையக்கூடும் என்ற அச்சம் அதிகரித்திருந்தது.
ஈரானை மிகக் கடுமையாக தாக்குவதாக ட்ரம்ப் அச்சுறுத்தியிருந்தார்.
மேலும், எரிசக்தி உள்கட்டமைப்புகள் மீதான தாக்குதல்கள் உட்பட, புதிய தாக்குதல்களை நடத்துவது குறித்தும் அவர் பரிசீலித்து வருவதாகக் கூறப்படுகிறது.
இதனைத் தொடர்ந்து, பிராந்தியம் முழுவதும் உள்ள அமெரிக்கத் தூதரகங்கள் எச்சரிக்கை நிலையில் வைக்கப்பட்டுள்ளன.
இந்த நிலையில், ஒரு ஒப்பந்தத்திற்கான அடிப்படை அம்சங்கள் தயாராக இருப்பதாகக் கூறி, சனிக்கிழமையன்று ட்ரம்ப் அந்த அச்சுறுத்தலிலிருந்து பின்வாங்கினார்.
ஞாயிற்றுக்கிழமை அன்று ‘ஏர் ஃபோர்ஸ் ஒன்’ (Air Force One) விமானத்தில் இருந்தபடி செய்தியாளர்களிடம் பேசிய ட்ரம்ப், தற்போது நாங்கள் அவர்களுடன் பேச்சுவார்த்தை நடத்தும் வகையில் உரையாடி வருகிறோம்; இந்தப் பேச்சுவார்த்தைகள் நாளை (இன்று) மதியம் தொடங்குகிறது – என்றார்.
எனினும், இப்பேச்சுவார்த்தை நடைபெறும் இடம் அல்லது இதில் பங்கேற்பவர்கள் குறித்த விவரங்களை அவர் வெளியிடவில்லை.
ஈரான் மற்றும் அமெரிக்காவின் பங்காளிகளாக சவுதி அரேபியா, ஐக்கிய அரபு எமீரகம் மற்றும் கட்டார் ஆகிய நாடுகள் தங்களைத் தாக்குதல் நடவடிக்கைகளை ஒத்திவைக்குமாறு கேட்டுக்கொண்டதாக அமெரிக்க ஜனாதிபதி தெரிவித்தார்.
அத்தாக்குதல் நடத்தப்பட்டிருந்தால் அது இரண்டாம் உலகப் போருக்குப் பிறகு நிகழ்ந்த மிகப்பெரிய தாக்குதலாக அமைந்திருக்கும் என்றும் அவர் குறிப்பிட்டார்.
எனினும், தாக்குதல் நடத்த வேண்டாம் என்று தெஹ்ரான் ட்ரம்பிடம் கேட்டுக்கொண்டதாகக் கூறப்படுவதை ஈரானிய ஊடகங்கள் மறுத்துள்ளன.
ஹார்முஸ் நீரிணையை மீண்டும் திறப்பதை உள்ளடக்கிய முந்தைய போர்நிறுத்த ஒப்பந்தம் தோல்வியடைந்தது, அதன் பின்னர் ஈரான் அந்த நீர்வழிப்பாதையின் மீதான தனது கட்டுப்பாட்டை இறுக்கியுள்ளது.
ஈரானின் அணுசக்தித் திட்டத்தைச் சமாளிக்க இந்தப் போர் அவசியம் என்று மோதலின் தொடக்கத்தில் அமெரிக்க ஜனாதிபதி கூறினார்.
ஈரான் அணுகுண்டுகளை தயாரிப்பதாக மேற்கத்திய நாடுகள் குற்றம் சாட்டுகின்றன, ஆனால் தெஹ்ரான் அந்தத் திட்டம் முற்றிலும் பொதுமக்கள் சார்ந்தது என்றும் வலியுறுத்தி வருகிறது.
