பகலை இரவாக்கிய அதிசயம்: ஐரோப்பாவில் முழு சூரிய கிரகணக் காட்சி!

இங்கிலாந்து மற்றும் ஐரோப்பா கடந்த சுமார் 30 ஆண்டுகளில் மிகவும் வியக்கத்தக்க சூரிய கிரகணத்தைக் கண்டு ரசித்துள்ளன.

எனினும், தலைமுறைக்கு ஒருமுறை மட்டுமே நிகழக்கூடிய அரிய வகை சூரிய கிரகணத்தை புதன்கிழமை (12) லட்சக்கணக்கான ஐரோப்பியர்கள் நேரில் கண்டு மூச்சடைத்தனர்.

ஐக்கிய இராச்சியத்திலிருந்து இந்த வானியல் நிகழ்வைக் கண்டவர்கள் ஒரு பகுதி சூரிய கிரகணத்தைக் காணும் வாய்ப்பைப் பெற்றனர்.

BST நேரம் 19:00 மணிக்குச் சற்றுப் பின்னர் இந்த நிகழ்வு உச்சத்தை அடைந்தபோது, ​​சூரியனின் 90%-க்கும் அதிகமான பகுதியை நிலவு மறைத்திருப்பதை பெரும்பாலானோர் கண்டனர்.

இருப்பினும், கிரீன்லாந்து, ஐஸ்லாந்து மற்றும் ஸ்பெயின் ஆகிய நாடுகளின் சில பகுதிகளில் முழு சூரிய கிரகணத்தின் முழுமையான இருளும் அதன் கண்கவர் காட்சியும் காணப்பட்டன.

முழு சூரிய கிரகணத்தின் பாதை, மக்கள் கூட்டமும் தொலைநோக்கிகளும் இல்லாத ரஷ்யாவின் சைபீரியப் பகுதியின் வடமுனையில் தொடங்கியது.

ஆனால், விரைவில் அது ஆர்க்டிக் பெருங்கடலைச் சுற்றி வளைத்துச் சென்று, மாலை வேளையில் ஐஸ்லாந்தை அடைந்தது; பின்னர் தெற்கு நோக்கி நகர்ந்து, ஐக்கிய இராச்சியத்திலும் பிற ஐரோப்பிய பகுதிகளிலும் தென்பட்டது.

வடக்கு ஸ்கொட்லாந்தில் மாலை 6:00 மணி (BST) அளவிலும், இங்கிலாந்தின் தெற்குக் கடற்கரைப் பகுதியில் மாலை 6:20 மணிக்கும் சற்று முன்னதாகவும் பகுதி சூரிய கிரகணம் தொடங்கியது.

தொடக்கத்தில் இது கண்ணுக்குத் தெரியாததாக இருந்தது; ஆனால் மேகமற்ற வானத்தைப் பார்க்கும் வாய்ப்பைப் பெற்றவர்களுக்கு, சூரியனை நிலவு மெல்ல மெல்ல மறைப்பதை மக்கள் காண முடிந்தது.

மத்திய மற்றும் தெற்கு இங்கிலாந்து மற்றும் வேல்ஸ் பகுதிகளில் வானம் மிகவும் தெளிவாக இருந்ததால், சூரியனை நிலவு மெதுவாகக் கடந்து சென்ற அந்த நிகழ்வை மக்கள் மிகத் தெளிவாகக் காண முடிந்தது.

வடக்கு இங்கிலாந்து, ஸ்கொட்லாந்து மற்றும் வட அயர்லாந்து பகுதிகளில் வானம் மேகமூட்டத்துடன் காணப்பட்டாலும், ஐக்கிய இராஜ்ஜியத்தின் பல்வேறு முக்கிய இடங்களிலும் மக்கள் திரண்டு வந்து இந்நிகழ்வைக் கண்டுகளிப்பதைத் அது தடுக்கவில்லை.

சிலர் சூரிய கிரகணத்தைப் பார்ப்பதற்கான சிறப்பு கண்ணாடிகளைப் பெற முடிந்தாலும், நிகழ்வுக்கு முந்தைய நாட்களில் அவற்றிற்கு கடும் தட்டுப்பாடு நிலவியது.

இருப்பினும், இது மக்களைத் தடுத்து நிறுத்தவில்லை; அவர்கள் பல்வேறு மாற்று வழிகளில் பாதுகாப்பான முறையில் பகுதி சூரியக் கிரணத்தை கண்டுகளித்தனர்.

சூரியனுக்கும் பூமிக்கும் இடையே நிலவு கடந்து செல்லும்போது சூரிய கிரகணம் ஏற்படுகிறது; அப்போது நிலவு சூரிய ஒளியின் ஒரு பகுதியையோ அல்லது முழுவதுமாகவோ மறைத்து, நமது பூமியின் மீது நிழலை விழச் செய்கிறது.

ஐக்கிய இராச்சியத்திலிருந்து பார்க்கும்போது, ​​சூரியன், நிலவு மற்றும் பூமி ஆகியவை மிகத் துல்லியமான நேர்கோட்டில் அமையவில்லை.

இதன் விளைவாக ஒரு பகுதி சூரிய கிரகணம் ஏற்பட்டது; ஐக்கிய இராச்சியத்தின் பெரும்பாலான பகுதிகளில் நிலவு சூரியனின் சுமார் 90 சதவீதத்தை மறைத்தது. 

இது 1999-க்குப் பிறகு அந்நாட்டில் நிகழ்ந்த மிகச் சிறப்பான கிரகணமாக அமைந்தது. 

கொர்ன்வால் (Cornwall) பகுதியில் இந்த மறைப்பு அளவு 95 சதவீதமாக இருந்தது.

அதேநேரம், ஸ்பெயினின் சில பகுதிகள் இன்னும் அற்புதமான ஒரு நிகழ்வை அனுபவிக்கும் வாய்ப்பைப் பெற்றன.

தோராயமாக 19:30 BST (உள்ளூர் நேரப்படி 20:30) அளவில், சூரியன், நிலவு மற்றும் பூமி ஆகியவை மிகத் துல்லியமாக ஒரே நேர்கோட்டில் அமைந்தன – இது ஒரு முழு சூரிய கிரகணமாக அங்கு அமைந்தது.

பூமியில் எங்காவது ஒரு இடத்தில் ஏறக்குறைய 18 மாதங்களுக்கு ஒருமுறை முழு சூரிய கிரகணம் நிகழ்கிறது.

ஆனால், ஒரு குறிப்பிட்ட இடத்தைப் பொறுத்தவரை இது மிகவும் அரிதான நிகழ்வாகும்; அங்கு சுமார் 400 ஆண்டுகளுக்கு ஒருமுறை மட்டுமே இது நிகழ்கிறது.

இந்த நிலையில் ஸ்பெயினில் முழு சூரிய கிரகணம் நிகழும் பாதையில் கூடியிருந்த மக்கள் அந்த அரிய நிகழ்வைக் காணும் வாய்ப்பைப் பெற்றனர்.

அப்போது நிலவுக்குப் பின்னாலிருந்து சூரியனின் சிவப்பு நிற ஒளிவட்டம் தெரிந்தது.

அந்த இருளுக்கு மத்தியிலிருந்து வெளிப்பட்ட ஒளி சூரியனின் ‘கொரோனா’ (சூரியனின் வெளிவளிமண்டலம்) ஆகும்.

இது விண்வெளியில் ஆயிரக்கணக்கான மைல்கள் தூரம் வரை வீசப்படும் மிக அதிக வெப்பம் கொண்ட வாயுப் பாய்ச்சல்களாகும்.

மேலும், உன்னிப்பாகக் கவனித்தவர்களுக்கு, சூரியனின் கொந்தளிப்பான காந்தப்புலத்தைப் பின்பற்றி அமைந்த ‘புரோமினன்ஸ்’ (prominences) எனப்படும் இளஞ்சிவப்பு நிற வாயுக்களின் சிறிய வளைவுகள் தெரிந்திருக்கக்கூடும்.

அதன்பிறகு, சந்திரன் தான் மறைத்து வைத்திருந்த சூரியனை மீண்டும் வெளிப்படுத்தத் தொடங்கியது.

முழு சூரிய கிரகணம் இரண்டு நிமிடங்களுக்கும் குறைவான நேரமே நீடித்தது – ஆனால் பலருக்கு அது மறக்க முடியாத ஒரு நிகழ்வாக அமைந்தது.

முழு சூரிய கிரகணத்தை நாம் காணும் வாய்ப்பைப் பெற்றிருப்பது ஒரு வியக்கத்தக்க அண்டவியல் தற்செயல் நிகழ்வாகும்.

சூரியன் பூமியிலிருந்து 150 மில்லியன் கிலோ மீட்டர் (93 மில்லியன் மைல்) தொலைவில் உள்ளது – இது சந்திரனை விட 400 மடங்கு அதிக தொலைவாகும்.

ஆனால் சந்திரனின் விட்டம் சூரியனின் விட்டத்தை விட 400 மடங்கு குறைவாக இருப்பதால், நம் வானத்தில் அவை இரண்டும் ஒரே அளவிலானவையாகத் தோன்றுகின்றன.

சந்திரன் சற்று சிறியதாக இருந்திருந்தாலோ அல்லது அதன் சுற்றுப்பாதை பூமியிலிருந்து இன்னும் சற்று தொலைவில் இருந்திருந்தாலோ, நாம் ஒருபோதும் முழு சூரிய கிரகணத்தைக் கண்டிருக்க முடியாது. 

எவ்வாறெனினும், 2026 மற்றும் 2028-க்கு இடைப்பட்ட காலத்தில், முழு சூரிய கிரகணங்களின் ஒரு “பொற்காலத்திற்கு” நாம் நுழையவிருக்கிறோம்.

அடுத்த சில ஆண்டுகளில் நிகழவுள்ள மூன்று முழு சூரிய கிரகணங்களின் கண்கவர் காட்சிகளைக் காண, கிரகண ஆர்வலர்கள் உலகம் முழுவதும் பயணம் செய்யலாம்.

ஆனால், இவற்றில் எதுவும் ஐக்கிய இராச்சியத்தில் தெரியாது. அந்நாட்டில் காணக்கூடிய சிறந்த நிகழ்வாக, 2027-ல் நிகழவுள்ள ஒரு பகுதி சூரிய கிரகணம் மட்டுமே இருக்கும்; அப்போது சில பகுதிகளில் சூரியன் சுமார் 45% அளவுக்கு மறைக்கப்பட்டிருக்கும்.

தற்போதைய நிலையை விட அதிக அளவில் சூரியன் மறையும் வகையிலான ஒரு சூரிய கிரகணத்தை ஐக்கிய இராச்சியம் காண இன்னும் பல தசாப்தங்கள் ஆகலாம்.

அது 2081-இல் நிகழும்; அப்போது சூரியனின் 99% வரை மறைக்கப்படும்.

மேலும், ஐக்கிய இராச்சியத்தில் அடுத்த முழு சூரிய கிரகணம் 2090-இல் நிகழும்.