இங்கிலாந்தின் மிடில்ஸ்பரோ அருகே A66 வீதியில் இடம்பெற்ற பயங்கர வாகன விபத்தில் இரு பொலிஸ் அதிகாரிகள் உட்பட ஏழு பேர் உயிரிழந்துள்ளனர். இந்தச் சம்பவம் நேற்று அதிகாலை சுமார் 3.39 மணியளவில் South Bank பகுதியில் இடம்பெற்றதாக தெரிவிக்கப்பட்டுள்ளது.
பொலிஸாரால் அடையாளம் காணப்பட்ட அதிகாரிகளான 37 வயதுடைய PC Matthew Blades மற்றும் 38 வயதுடைய PC Tom Clough ஆகியோர் விபத்தில் உயிரிழந்துள்ளனர். அவர்கள் பயணித்த அடையாளமிடப்பட்ட பொலிஸ் வாகனம், வீதியின் தவறான திசையில் பயணித்த Volkswagen Passat வாகனத்துடன் நேருக்கு நேர் மோதியுள்ளது. Passat வாகனத்தில் பயணித்த மேலும் ஐந்து பேரும் உயிரிழந்துள்ளனர்.
சந்தேகத்திற்கிடமான வாகனம் தொடர்பில் பொலிஸார் நடவடிக்கை மேற்கொண்டிருந்த நிலையில் இந்தச் சம்பவம் இடம்பெற்றதாகவும், விபத்தின் பின்னணி குறித்து Independent Office for Police Conduct (IOPC) விசாரணையை ஆரம்பித்துள்ளதாகவும் தெரிவிக்கப்பட்டுள்ளது.
Cleveland Police தலைமை அதிகாரி Victoria Fuller, உயிரிழந்த அதிகாரிகளை சமூகத்தை பாதுகாத்து சேவையாற்றிய “துணிச்சலான அதிகாரிகள்” என நினைவுகூர்ந்துள்ளார். அவர்களின் குடும்பத்தினருக்கு ஆழ்ந்த அனுதாபங்களும் தெரிவிக்கப்பட்டுள்ளன.
உள்ளூர் நாடாளுமன்ற உறுப்பினர் Anna Turley, இந்தச் சம்பவத்தால் முழு சமூகமும் அதிர்ச்சியிலும் பெரும் துயரத்திலும் இருப்பதாக தெரிவித்துள்ளார். விசாரணைகள் நடைபெறும் நிலையில் சமூக வலைத்தளங்களில் ஊகங்களை பரப்ப வேண்டாம் எனவும் அதிகாரிகள் கோரிக்கை விடுத்துள்ளனர்.
