சிக்மா விழாவில் அரசியல் நிழல்: ஜேசன் சஞ்சயை உற்சாகப்படுத்திய டிவிகே கோஷங்கள்!

தமிழ்நாட்டின் சேலத்தில் செவ்வாய்க்கிழமை (08) மாலை நடைபெற்ற தனது முதல் திரைப்படமான சிக்மாவின் (Sigma) வெளியீட்டுக்கு முந்தைய விழாவில், நடிகரும் முதலமைச்சருமான விஜய்யின் மகன் ஜேசன் சஞ்சய், தனது தந்தையின் அரசியல் கட்சியான ‘தமிழக வெற்றி கழகம்’ (TVK) குறித்த முழக்கங்களால் இடையூறுக்குள்ளானார். 

நிகழ்வல் இளம் இயக்குநர் ‍ஜேசன் சஞ்சய் பேசும் போது ஒரு கட்டத்தில், நடிகர் விஜய் தொடங்கிய அந்தக் கட்சிக்கு ஆதரவாகக் கூடியிருந்த மக்கள் தொடர்ந்து முழக்கமிட்டு உற்சாகப்படுத்தினர்.

இதற்கு ஜேசன் சஞ்சய் புன்னகைத்துத் தலையசைத்தார். 

‘டிவிகே’ என்ற கோஷங்கள் வலுப்பெறுவதற்கு முன்பு, தொகுப்பாளர் ஒலிவாங்கியின் ஒலியளவைச் சரிசெய்யவும் முயன்றார். 

பின்னர் ஜேசன் கூட்டத்தினருக்குப் பெருவிரலைக் காட்டிவிட்டு, தனது உரையைத் தொடர்ந்தார்.

தந்தைக்கும் மகனுக்கும் இடையே பிளவு ஏற்பட்டதாகக் கூறப்படும் யூகங்களுக்கு மத்தியில், இந்த ‘டிவிகே’ கோஷங்கள் எழுந்துள்ளன. 

விஜய்யின் மனைவி சங்கீதா சொர்ணலிங்கம் விவாகரத்து கோரி மனு தாக்கல் செய்ததாக செய்திகள் வெளியான பின்னர் இந்த வதந்திகள் தொடங்கின. 

கடந்த மார்ச் மாதம் ஜேசன் இன்ஸ்டாகிராமில் தனது தந்தையைப் பின்தொடர்வதை நிறுத்தியதாகக் கூறப்பட்டதை அடுத்து, அவை மேலும் வலுப்பெற்றன.

பின்னர் ஆகஸ்ட் மாதத்தில் சங்கீதா தனது விவாகரத்து மனுவைத் திரும்பப் பெற்றார். 

விஜய் அல்லது ஜேசன் ஆகிய இருவருமே தங்கள் உறவு குறித்த யூகங்கள் குறித்துப் பொதுவெளியில் எதுவும் பேசவில்லை.

சேலத்தில் நடைபெற்ற நிகழ்ச்சியில், ஜேசன் தனது குடும்பத்தைப் பற்றியும் நெகிழ்ச்சியுடன் பேசினார். 

தான் பார்த்த முதல் திரைப்படம் எது என்று கேட்கப்பட்டபோது, ​​விஜய் மற்றும் ஜோதிகா நடித்த ‘திருமலை’ படம்தான் அது என்றும், அதைத் தான் மூன்று வயதாக இருந்தபோது பார்த்ததாகவும் அவர் தெரிவித்தார். 

சிக்மா (Sigma) திரைப்படம் ஜேசன் சஞ்சய் இயக்குநராக அறிமுகமாகும் படைப்பாகும். 

லைகா புரொடக்ஷன்ஸ் தயாரிக்கும் இத்திரைப்படம் ஒரு ‘ஹெய்ஸ்ட் காமெடி’ (heist comedy) வகையைச் சேர்ந்தது.

இதில் சந்தீப் கிஷன், ஃபாரியா அப்துல்லா, சம்பத் ராஜ், ஷிவ் பண்டிட், யோக் ஜாபி, ஷீலா ராஜ்குமார் மற்றும் ராஜு சுந்தரம் உள்ளிட்ட பலர் நடித்துள்ளனர். 

இப்படத்திற்கு தமன் எஸ் இசையமைத்துள்ளார். 

முதலில் ஜூலை 31 அன்று வெளியாகவிருந்த இப்படம், ஜூலை 23 அன்று விஜய்யின் ‘ஜனநாயகன்’ திரைப்படம் திரையரங்குகளில் வெளியானதைத் தொடர்ந்து ஒத்திவைக்கப்பட்டமையும் குறிப்பிடத்தக்கது.