அறுவை சிகிச்சை மூலம் வலது நுரையீரலின் ஒரு பகுதி செவ்வாய்க்கிழமை (13) அன்று அகற்றப்பட்டதைத் தொடர்ந்து, போப் லியோவுக்கு நுரையீரல் புற்றுநோய் இருப்பது கண்டறியப்பட்டதாக வத்திக்கான் மருத்துவ அறிக்கை ஒன்றில் தெரிவித்துள்ளது.
இது 71 வயதான போப் அவர்களுக்கு ஏற்பட்டுள்ள ஒரு குறிப்பிடத்தக்க உடல்நலப் பின்னடைவாகும்.
போப்பாண்டவருக்கு நுரையீரல் அடினோகார்சினோமா என்ற ஒரு பொதுவான வகை புற்றுநோய் உள்ளது என்றும், அறுவை சிகிச்சையின் போது நடத்தப்பட்ட திசுப் பரிசோதனைகள், ஆயத்தப் பரிசோதனைகளில் மருத்துவர்கள் சந்தேகித்ததை உறுதிப்படுத்தியுள்ளன என்றும் அந்த அறிக்கை தெரிவித்தது.
அண்மைய வழக்கமான மருத்துவப் பரிசோதனையின்போது மருத்துவர்கள் கண்டறிந்த கட்டியை அகற்றுவதற்கான அறுவை சிகிச்சைக்காக, லியோ செவ்வாய்க்கிழமையன்று ரோமில் உள்ள ஜெமெல்லி மருத்துவமனையில் அனுமதிக்கப்பட்டார்.
சுமார் 90 நிமிடங்கள் நடைபெற்ற இந்த அறுவை சிகிச்சை எவ்வித சிக்கல்களுமின்றி வெற்றிகரமாக அமைந்ததாக போப்பாண்டவரின் முதன்மை அறுவை சிகிச்சை நிபுணரான மருத்துவர் ஸ்டெஃபானோ மார்கரிட்டோரா மற்றும் அவரது தனிப்பட்ட மருத்துவரான லூய்கி கார்போன் ஆகியோர் வெளியிட்ட அறிக்கையில் தெரிவித்தனர்.
போப்பின் உடல்நிலையை மதிப்பிடுவதற்கு, கட்டியின் அளவு மற்றும் புற்றுநோய் நிணநீர் முனைகளுக்குப் (lymph nodes) பரவியுள்ளதா என்பது குறித்த தகவல்கள் தேவை என்று மருத்துவ நிபுணர் ஒருவர் தெரிவித்தார்.
ஆனால், வத்திக்கான் இந்தத் தகவல்களை உடனடியாக வழங்கவில்லை.
அறுவை சிகிச்சைக்குப் பின்னர் போப் இயல்பு நிலையில் சுயநினைவு பெற்றார்; பின்னர் அவர் மருத்துவமனை அறையில் ஓய்வெடுத்து வருவதாக மருத்துவ அறிக்கை தெரிவித்தது.
போப் லியோ சுமார் ஒரு வாரம் மருத்துவமனையில் இருக்கக்கூடும் என்றும், ஒக்டோபர் 20 வரை அவரது அனைத்து பொது நிகழ்ச்சிகளும் இரத்து செய்யப்பட்டுள்ளதாகவும் வத்திக்கான் இந்த வாரத் தொடக்கத்தில் தெரிவித்தது.
மே 2025-ல் உலகின் கர்தினால்களால் தேர்ந்தெடுக்கப்பட்ட லியோ, ஒரு திருச்சபை தலைவருக்குரிய வயதைக் கணக்கிடுகையில் ஒப்பீட்டளவில் இளையவர் ஆவார்.
டென்னிஸ் உள்ளிட்ட விளையாட்டுகளில் ஆர்வம் கொண்ட இவர், புகைப்பிடிக்கும் பழக்கம் இல்லாதவர்; மேலும் அண்மைய காலமாக அவருக்கு உடல்நலப் பிரச்சினைகள் எதுவும் இருந்ததாகத் தெரியவில்லை.
லியோவுக்கு முந்தையவரான மறைந்த போப் பிரான்சிஸ், தனது பிற்காலத்தில் உடல்நலம் குன்றியிருந்தபோது பலமுறை மருத்துவமனையில் அனுமதிக்கப்பட்டார்.
அவர் 2025 ஏப்ரல் மாதம் தனது 88 ஆவது வயதில் காலமானார் என்பதும் குறிப்பிடத்தக்கது.
அடினோகார்சினோமா என்றால் என்ன?
அடினோகார்சினோமா என்பது உடலின் சுரப்பித் திசுக்களில் உருவாகும் ஒரு வகையான புற்றுநோயாகும். இது நுரையீரல் உள்ளிட்ட பல்வேறு உறுப்புகளில் ஏற்படக்கூடும்.
