டெல்லி கேபிடல்ஸ் அணி, தனது மறுசீரமைக்கப்பட்ட பயிற்சியாளர் குழுவில் மேலும் ஒரு அனுபவம் வாய்ந்த நபரைச் சேர்த்துள்ளது.
அதன்படி, 2027 இந்தியன் பிரீமியர் லீக் தொடருக்காக, இலங்கை அணியின் முன்னாள் வேகப்பந்து வீச்சாளர் சமிந்த வாஸை அந்த அணி பந்துவீச்சு பயிற்சியாளராக நியமித்துள்ளது.
சமிந்த வாஸ் இடம்பெற்ற சமூக ஊடக வீடியோ ஒன்றின் வாயிலாக இந்த நியமனத்தை அந்த அணி அறிவித்துள்ளது.
சௌரவ் கங்குலி மற்றும் யுவராஜ் சிங் ஆகியோருக்குப் பின்னர், அணியில் இணைந்துள்ள மற்றொரு முக்கியமான நபர் இவராவார்.
இலங்கையின் மிக வெற்றிகரமான வேகப்பந்து வீச்சாளர்களில் ஒருவரான வாஸ், தனது சர்வதேச விளையாட்டு வாழ்க்கையை 111 டெஸ்ட் போட்டிகளில் 355 விக்கெட்டுகளுடனும், 322 ஒருநாள் போட்டிகளில் 400 விக்கெட்டுகளுடனும் நிறைவு செய்தார்.
1996 ஆம் ஆண்டு உலகக் கிண்ணத்தை வென்ற இலங்கை அணியில் இடம்பெற்றிருந்த இந்த இடது கை வேகப்பந்து வீச்சாளர், தனது துல்லியமான பந்துவீச்சு, புதிய பந்தை ஸ்விங் செய்யும் திறன் மற்றும் எந்தச் சூழலிலும் சிறப்பாகச் செயல்படும் ஆற்றல் ஆகியவற்றிற்குப் பெயர் பெற்றவர்.
52 வயதான இவருக்குப் பயிற்சியாளராகச் கணிசமான அனுபவம் உள்ளது.
இவர் இலங்கை அணியின் முதன்மை அணி மற்றும் அதன் துணை அணிகளுடன் பணியாற்றியுள்ளார்.
2016 டி20 உலகக் கிண்ணத்தின் போது அயர்லாந்து அணியின் பந்துவீச்சுப் பயிற்சியாளராகச் செயல்பட்டுள்ளார்.
மேலும், நியூசிலாந்து அணியின் வேகப்பந்து வீச்சாளர்களுக்கு ஆலோசகராகவும் பணியாற்றியுள்ளார்.
பிந்தைய ஆண்டுகளிலும் இவர் இலங்கை அணியில் பல்வேறு பயிற்சியாளர் பொறுப்புகளை வகித்துள்ளார்.
அவரது நியமனம், 2027 சீசனுக்காக வலுவான ஆதரவுக் குழுவை உருவாக்கும் முயற்சியில் ஈடுபட்டுள்ள டெல்லி அணியின் மறுசீரமைப்பு நடவடிக்கையில் மற்றொரு மைல்கல்லாகும்.
இந்திய அணியின் முன்னாள் தலைவர் கங்குலி, ஒக்டோபர் 6 அன்று டெல்லி கேபிடல்ஸ் அணியின் தலைமைப் பயிற்சியாளராக நியமிக்கப்பட்டார்.
இதன் மூலம், 2019-ஆம் ஆண்டு முதல் தான் இணைந்து பணியாற்றி வந்த இந்த அணிக்கு அவர் மீண்டும் திரும்பியுள்ளார்.
SA20 தொடரில் பிரிட்டோரியா கேபிடல்ஸ் அணியை வழிநடத்தியதைத் தொடர்ந்து, ஐபிஎல் தொடரில் தலைமைப் பயிற்சியாளராக அவர் மேற்கொள்ளும் முதல் பணி இதுவாகும்.
ஒக்டோபர் 13 அன்று, யுவராஜ் சிங் தனது முதல் முறையான பயிற்சியாளர் பணியை, உதவிப் பயிற்சியாளர் மற்றும் துடுப்பாட்ட பயிற்சியாளராகத் தொடங்கினார்.
இந்தியாவின் 2007 டி20 உலகக் கிண்ணம் மற்றும் 2011 ஒருநாள் உலகக் கிண்ண வெற்றிகளில் முக்கியப் பங்காற்றிய இந்த முன்னாள் சகலதுறை வீரர், டெல்லி அணி தனது முதல் ஐபிஎல் பட்டத்தை வெல்ல முயற்சிக்கும் சூழலில், கங்குலியுடன் மீண்டும் இணைந்து பணியாற்றவுள்ளார்.
தலைமைப் பயிற்சியாளர் ஹேமங் பதானியின் கீழ் இரண்டு சீசன்களைக் கழித்த பிறகு, டெல்லி அணி தனது முந்தைய பயிற்சியாளர் குழுவிலிருந்து பிரிந்ததைத் தொடர்ந்து இந்த மாற்றங்கள் நிகழ்ந்துள்ளன.
2025-ஆம் ஆண்டு பிளேஆஃப் சுற்றுக்குத் தகுதி பெறத் தவறிய அந்த அணி, 2026 ஐபிஎல் தொடரில் ஆறாவது இடத்தைப் பிடித்தது.
வாஸின் சர்வதேச பந்துவீச்சு நிபுணத்துவம், கங்குலியின் தலைமைத்துவம் மற்றும் யுவராஜின் பேட்டிங் அனுபவம் ஆகியவற்றுடன், மாற்றியமைக்கப்பட்ட இந்த பயிற்சியாளர் குழு, டெல்லியின் சாம்பியன் பட்டக் கனவை நனவாக்க உதவும் என்று அந்த அணி நம்புகிறது.
