ஓராண்டுக்கு முன் மாயமான இளைஞர் கொலை – திடுக்கிடும் தகவல்கள் வெளியீடு!

கடந்த ஆண்டு ஒக்டோபர் மாதம் வெல்லம்பிட்டிய பகுதியில் காணாமல் போன 24 வயது இளைஞர் ஒருவரின் கொலையுடன் தொடர்புடைய சந்தேக நபர்கள் நால்வர் கைது செய்யப்பட்டுள்ளதாக பொலிஸார் தெரிவித்தனர்.

பொலிஸ் ஊடகப் பிரிவின் தகவல்படி, பாதிக்கப்பட்ட நபர் கிரேண்ட்பாஸில் உள்ள வாகன பழுதுபார்க்கும் பட்டறை ஒன்றில் வைத்து கொலை செய்யப்பட்டிருக்கலாம் என்றும், பின்னர் அவரது உடல் எரிக்கப்பட்டு, எஞ்சிய மனித எச்சங்கள் களனி ஆற்றில் வீசப்பட்டிருக்கலாம் என்றும் விசாரணையில் தெரியவந்துள்ளது.

பாதிக்கப்பட்டவர் காணாமல் போனது குறித்து 2025 ஒக்டோபர் 14 அன்று கிரேண்ட்பாஸ் பொலிஸாருக்குத தகவல் தெரிவிக்கப்பட்டது.

2025 ஒக்டோபர் 11 அன்று, கம்பிகோடுவாவத்தையில் உள்ள வாகன பழுதுபார்க்கும் பட்டறை ஒன்றில் அவர் சில நபர்களுடன் மது அருந்திக்கொண்டிருந்தது விசாரணையில் தெரியவந்தது. 

அவர் காணாமல் போனதைத் தொடர்ந்து, அவருடன் இருந்த நபர்கள் அங்கிருந்து தப்பிச் சென்றதாகக் கூறப்படுகிறது.

2026 ஒக்டோபர் 30-அன்று, கொழும்பு மாவட்ட குற்றப்பிரிவு அதிகாரிகள் மபோல மற்றும் மஹர ஆகிய இடங்களில் இரு சந்தேக நபர்களைக் கைது செய்தனர். 

விசாரணையின் போது கிடைத்த தகவல்களின் அடிப்படையில், உஸ்வெட்டகெய்யாவவில் மேலும் இரு சந்தேக நபர்கள் கைது செய்யப்பட்டனர்.

29, 32, 37 மற்றும் 46 வயதுடைய அந்த நான்கு சந்தேக நபர்களும் வெல்லம்பிட்டிய மற்றும் அகலவத்த ஆகிய பகுதிகளைச் சேர்ந்தவர்கள் ஆவர்.

பாதிக்கப்பட்ட நபர் பணிமனையிலேயே கொல்லப்பட்டதாகவும், அதன்பிறகு அவரது உடல் கிரிந்திவெல பொலிஸ் பிரிவுக்கு உட்பட்ட பாபிலியாவல பகுதிக்குக் கொண்டு செல்லப்பட்டு தீயிட்டு எரிக்கப்பட்டதாகவும் விசாரணையில் தெரியவந்துள்ளதாக பொலிஸார் தெரிவித்தனர்.

மீதமிருந்த மனித எச்சங்கள், கொஸ்கம பொலிஸ் பிரிவுக்கு உட்பட்ட ரன்வல பாலத்திலிருந்து களனி ஆற்றில் வீசப்பட்டதாகக் கூறப்படுகிறது.

குற்றச் செயலுடன் தொடர்புடையவை என்று சந்தேகிக்கப்படும் பல பொருட்களை புலனாய்வாளர்கள் கண்டெடுத்தனர்.

அவற்றில் மோட்டார் சைக்கிள் ஒன்றின் இக்னிஷன் சாவி (ignition key), தாயத்து, எலும்புத் துண்டுகள் மற்றும் எரிந்த கூடாரத் துணியின் ஒரு பகுதி ஆகியவை அடங்கும்.

இந்தக் கண்டுபிடிப்புகள் பூகொட நீதவான் நீதிமன்றத்திற்குத் தெரிவிக்கப்பட்டன. 

அதனைத் தொடர்ந்து, பூகொட நீதவான் மற்றும் நீதித்துறை மருத்துவ அதிகாரி முன்னிலையில் குற்றச் நடந்த இடத்தில் ஆய்வு மேற்கொள்ளப்பட்டது.

நவம்பர் 1 அன்று, இலங்கை கடற்படை சுழியோடிகள், அவிசாவளை நீதிவான் மற்றும் சீதாவக்க குற்றச் சம்பவ இட புலனாய்வுப் பிரிவு ஆகியவற்றின் உதவியுடன், ரன்வல பாலத்திற்கு அருகிலுள்ள களனி ஆற்றில் தனித் தேடுதல் நடவடிக்கை ஒன்று முன்னெடுக்கப்பட்டது.

கைது செய்யப்பட்டுள்ள நான்கு சந்தேக நபர்களும் நவம்பர் 2-ஆம் திகதி வரை விளக்கமறியலில் வைக்கப்பட்டுள்ளதாக பொலிஸார் தெரிவித்தனர். 

இதற்கிடையில், கொழும்பு மாவட்ட குற்றப் புலனாய்வுப் பிரிவு இது குறித்த மேலதிக விசாரணைகளை முன்னெடுத்து வருகிறது.