ஹார்முஸ் நீரிணையில் இரண்டு எண்ணெய் டேங்கர் கப்பல்கள் கடற்படை கண்ணிவெடிகளில் மோதியதால் வெடித்ததாக ஈரானின் இஸ்லாமிய புரட்சிகர காவல் படையின் (IRGC) கடற்படை ஞாயிற்றுக்கிழமை (01) தெரிவித்துள்ளது.
இதில் ஒரு பிரம்மாண்ட எண்ணெய் டேங்கர் கப்பல், பலத்த வெடிவிபத்துக்குப் பிறகு தொடர்ந்து எரிந்து கொண்டிருக்கிறது.
இந்த வெடிவிபத்துகளால் இரண்டு கப்பல்களும் நகர முடியாத நிலைக்குத் தள்ளப்பட்டதாக அந்தப் படை தெரிவித்துள்ளது.
அங்கீகரிக்கப்படாத பாதையில் செல்ல முயற்சிப்பதற்காக, இரண்டு எரிபொருள் கப்பல்களும் தங்களின் வழிசெலுத்தல் மற்றும் அடையாள அமைப்புகளை அணைத்துவிட்டதாகவும், அவை அமெரிக்க இராணுவத்தின் ஆதரவுடன் இயங்கி வருவதாகவும் IRGC கடற்படை தெரிவித்தது.
அந்த அறிக்கையில் எரிபொருள் கப்பல்களின் பெயர்களோ, அவற்றின் பணியாளர்கள் அல்லது ஏற்படக்கூடிய உயிரிழப்புகள் குறித்த தகவல்களோ வழங்கப்படவில்லை.
2026 பெப்ரவரி 28 அன்று அமெரிக்காவும் இஸ்ரேலும் ஈரான் மீது தாக்குதல்களைத் தொடங்கியதிலிருந்து கடல்சார் பதற்றங்கள் நீடித்து வருகின்றன.
ஏப்ரல் மாதம் போர்நிறுத்தம் ஏற்படும் வரை, ஈரான் அதற்குப் பதிலடியாக இஸ்ரேலிய மற்றும் அமெரிக்க இலக்குகளைத் தாக்கியிருந்தது.
அமெரிக்காவும் ஈரானும் ஜூன் 18 அன்று நீரிணையில் கப்பல் போக்குவரத்திற்கான சுதந்திரம் குறித்த புரிந்துணர்வு ஒப்பந்தத்தில் கையெழுத்திட்டன, ஆனால் பாதுகாப்பு ஏற்பாடுகள் தொடர்பான கருத்து வேறுபாடுகள் காரணமாக அதன் அமுலாக்கம் தடைபட்டது.
இந்த முக்கிய எண்ணெய் போக்குவரத்து பாதையில் கடல்சார் பாதுகாப்பு நெறிமுறைகள் தொடர்பாக வொஷிங்டனும் தெஹ்ரானும் தொடர்ந்து முரண்பட்டு வரும் நிலையில், இந்த அண்மைய வெடிப்புகள் நிகழ்ந்துள்ளன.
