ஓமானின் அல் அமெராத்தில் நடைபெற்ற கடைசிப் பந்து வரை பரபரப்பாகச் சென்ற போட்டியில் பாகிஸ்தானை ஒரு விக்கெட் வித்தியாசத்தில் வீழ்த்தி இந்தியா அபார வெற்றி பெற்றது.
மோஹித் உல்வா மற்றும் மனால் சவுகான் ஆகியோர் கடைசி வரிசையில் அபாரமாக ஆடி அணியைக் மீட்டதன் மூலம் 19 வயதுக்குட்பட்டோருக்கான ஆசியக் கிண்ணத்தை இந்தியா மீண்டும் கைப்பற்றியது.
338 ஓட்டங்கள் என்ற கடினமான இலக்கை நோக்கி விளையாடிய இந்தியா, 42 ஆவது ஓவரில் 8 விக்கெட்டுகளை இழந்து 252 ஓட்டங்களுடன் பெரும் நெருக்கடியில் இருந்தது.
ஆனால், மனல் (32 பந்துகளில் 47 ஓட்டங்கள்) மற்றும் மோஹித் (26 பந்துகளில் ஆட்டமிழக்காமல் 49 ஓட்டங்கள்) ஆகியோர் இணைந்து, 9 ஆவது விக்கெட்டுக்கு முக்கியமான 57 ஓட்டங்களைச் சேர்த்து ஆட்டத்தின் போக்கையே மாற்றினர்.
302 ஓட்டங்களுக்கு மனல் ஆட்டமிழந்தபோது, இந்தியா வெற்றி பெற இன்னும் 36 ஓட்டங்கள் தேவைப்பட்டன, கையில் ஒரு விக்கெட் மட்டுமே இருந்தது.
இருப்பினும், 11 ஆவது வீரராகக் களமிறங்கிய சி. வெங்கடா (எட்டு பந்துகளில் ஆட்டமிழக்காமல் 11 ஓட்டங்கள்) சிறந்த துணையாக அமைய, இருவரும் இந்தியாவின் வெற்றி நம்பிக்கையைத் தக்கவைத்தனர்.
இறுதி ஓவரில் எட்டு ஓட்டங்கள் தேவைப்பட்ட நிலையில், கடைசிப் பந்தில் இந்தியாவுக்கு மூன்று ஓட்டங்கள் தேவைப்பட்டன.
அந்த முக்கியமான தருணத்தில் சிறப்பாகச் செயல்பட்ட மோகித், இடதுகை சுழற்பந்து வீச்சாளர் அகமட் ஹுசைனின் பந்தை லாங்-ஆஃப் திசைக்கு அப்பால் பவுண்டரிக்கு விரட்டி, ஒரு அபார வெற்றியை உறுதி செய்தார்.
இந்தியா ஒன்பது விக்கெட் இழப்புக்கு 339 ஓட்டங்களுடன் ஆட்டத்தை முடித்தது.
முன்னதாக, அணித் தலைவர் லக்ஷ்ய ராய்ச்சந்தானி (80) மற்றும் ஆர்யவீர் சேவாக் (58) ஆகியோர் இணைந்து, முதல் விக்கெட்டுக்கு 95 ஓட்டங்களை சேர்த்து இந்தியாவுக்கு வலுவான தொடக்கத்தை அமைத்துக் கொடுத்தனர்.
இருப்பினும், சேவாக் ஆட்டமிழந்ததைத் தொடர்ந்து, ராய்ச்சந்தானி மற்றும் அன்வாய் டிராவிட் ஆகியோரும் விரைவாக வெளியேறியதால் இந்தியா இக்கட்டான நிலைக்குத் தள்ளப்பட்டது.
ஆனால், அதன் பிறகு வரிசையில் பின்னால் களமிறங்கிய வீரர்கள் சிறப்பாகச் செயல்பட்டு அணியை மீண்டும் வலுவான நிலைக்குக் கொண்டு வந்தனர்.
போட்டியில் முதலில் துடுப்பாட்டம் செய்த பாகிஸ்தான் அணி, தொடக்க ஆட்டக்காரர் உஸ்மான் கானின் 107 ஓட்டங்கள் மற்றும் அப்துல் காதிரின் அதிரடியான 80 ஓட்டங்களின் உதவியுடன், ஒன்பது விக்கெட்டுகள் இழப்புக்கு 337 ஓட்டங்கள் எனும் வலுவான ஓட்ட எண்ணிக்கையை பதிவு செய்தது.
உஸ்மான் மற்றும் ஹயாம் கான் ஆகியோர் வெறும் 8.1 ஓவர்களில் தொடக்க விக்கெட்டுக்காக 62 ஓட்டங்களைச் சேர்த்தனர்; அதனைத் தொடர்ந்து, உஸ்மான் மற்றும் காதிர் இணைந்து இரண்டாவது விக்கெட்டுக்கு 18 ஓவர்களில் 135 ஓட்டங்களைக் குவித்தனர்.
உஸ்மான் 106 பந்துகளில் தனது சதத்தைப் பூர்த்தி செய்தார்.
மறுபுறம், காதிர் வெறும் 54 பந்துகளில் அதிரடியாக 80 ஓட்டங்களைக் குவித்தார்; அவர் 39 பந்துகளில் தனது முதல் ‘யூத் ஒருநாள்’ அரை சதத்தை எட்டினார்.
மேலும், சுழற்பந்து வீச்சாளர்களான மனல் மற்றும் யாஷ்பர்தன் சௌஹான் ஆகியோரின் பந்துவீச்சை எதிர்கொண்ட அவர், தொடர்ந்து சிக்ஸர்களை விளாசினார்.
அர்ஜுன் ராஜ்புத்தின் பந்துவீச்சில் காதிர் தூக்கி அடித்த ஷாட்டை, கவர் பகுதியில் நின்ற வி.கே. வினீத் பிடித்தபோது அவரது ஆட்டம் முடிவுக்கு வந்தது.
அவரைத் தொடர்ந்து வேகப்பந்து வீச்சாளர் காவ்யா பட்டேலின் (4/68) பந்துவீச்சில் உஸ்மான் கடுமையாக அடித்த ஷாட், மிட்-ஆஃப் பகுதியில் நின்ற ராஜ்புத்திடம் எட்ஜ் ஆனது.
36 ஓவர்கள் முடிவில் 3 விக்கெட் இழப்புக்கு 240 ஓட்டங்கள் எடுத்து பாகிஸ்தான் வலுவான நிலையில் இருந்தது; அணித் தலைவர் ஃபர்ஹான் யூசுஃப் 63 பந்துகளில் 60 ஓட்டங்கள் எடுத்து, அணியின் மொத்த ஓட்ட எண்ணிக்கையை 300-க்கு மேல் கொண்டு சென்றார்.
இறுதிக்கட்டத்தில் காவ்யா மற்றும் வெங்கடா (3/40) ஆகியோர் விக்கெட்டுகளை வீழ்த்தினர், ஆனால் அதற்குள்ளாகவே பாகிஸ்தான் சவாலான இலக்கை எட்டியிருந்தது.
இருப்பினும், இந்தியா அபாரமான ஆட்டத்தை வெளிப்படுத்தி, போட்டியின் கடைசி பந்தில் வெற்றியைத் தட்டிச் சென்று சாம்பியன் பட்டத்தைக் கைப்பற்றியது.
