ஐ.பி.எல். இருபதுக்கு இருபது தொடரின் ஒன்பதாவது லீக் போட்டியில், சன்ரைசஸ் ஹைதராபாத் அணியை 13 ஓட்டங்களால் வீழ்த்தி மும்பை இந்தியன்ஸ் அணி வெற்றிபெற்றுள்ளது.
சென்னை மைதானத்தில் நேற்று (சனிக்கிழமை) இடம்பெற்ற போட்டியில் நாணய சுழற்சியில் வெற்றிபெற்ற மும்பை அணி முதலில் துடுப்பெடுத்த தீர்மானித்தது.
அதன்படி முதலில் களமிறங்கிய மும்பை அணி நிர்ணயிக்கப்பட்ட 20 ஓவர்கள் நிறைவில் 5 விக்கெட்களை இழந்து 150 ஓட்டங்களை பெற்றுக்கொண்டது.
அவ்வணி சார்பாக ஆரம்ப துடுப்பாட்ட வீரர் டி கொக் 40 ஓட்டங்களையும் பொலார்ட் 35 ஓட்டங்களையும் அணித்தலைவர் ரோஹித் சர்மா 32 ஓட்டங்களையும் பெற்றுக்கொண்டனர்.
பந்துவீச்சில் முஜீப் மற்றும் விஜய் சங்கர் ஆகியோர் தலா இரண்டு விக்கெட்களையும் கலீல் அகமட் ஒரு விக்கெட்டினையும் வீழ்த்தினார்.
இதனை அடுத்து 151 ஓட்டங்கள் என்ற வெற்றி இலக்குடன் துடுப்பெடுத்தாடிய சன்ரைசஸ் ஹைதராபாத் அணி 19.4 ஓவர்கள் நிறைவில் அனைத்து விக்கெட்களையும் இழந்து 137 ஓட்டங்களை மாத்திரமே பெற்று 13 ஓட்டங்களால் தோல்வியடைந்தது.
அவ்வணி சார்பாக ஜொனி பேர்ஸ்டோவ் 43 ஓட்டங்களையும் டேவிட் வோர்னர் 36 ஓட்டங்களையும் விஜய் சங்கர் 28 ஓட்டங்களையும் பெற்றுக்கொண்டனர்.
பந்துவீச்சில் மும்பை அணி சார்பாக ட்ரெண்ட் போல்ட் மற்றும் ராகுல் சாஹர் தலா மூன்று விக்கெட்களை வீழ்த்தினர்.
இப்போட்டியின் ஆட்ட நாயகனாக அதிரடியாக 35 ஓட்டங்களை பெற்றுக்கொண்ட பொலார்ட் தெரிவு செய்யப்பட்டார்.
