பர்முயுலா-1 கார்பந்தயத்தின் மோனோகோ கிராண்ட் பிரிக்ஸ் சுற்றில், ரெட்புல் அணியின் வீரரான மேக்ஸ் வெர்ஸ்டபேன், முதலிடம் பெற்றுள்ளார்.
ஒவ்வொரு ஆண்டும் ‘பார்முலா 1’ கார் பந்தயம், 23 சுற்றுகளாக நடைபெறும். ஒவ்வொரு சுற்றும் ஒவ்வொரு நாடுகளில் நடைபெறும்.
இதன்படி, நடப்பு ஆண்டின் ஐந்தாவது சுற்றான மோனோகோ கிராண்ட் பிரிக்ஸ், நேற்று மோனோகோ சர்வதேச ஓடுதளத்தில் நடைபெற்றது.
இதில் 260.286 கிலோ மீட்டர் பந்தய தூரத்தை நோக்கி, 10 அணிகளை சேர்ந்த 20 வீரர்கள் காரில் சீறிப்பாய்ந்தனர்.
இதில் ரெட்புல் அணியின் வீரரான மேக்ஸ் வெர்ஸ்டபேன்;, பந்தய தூரத்தை 1 மணித்தியாலம் 38 நிமிடங்கள் 56.820 வினாடிகளில் இலக்கை கடந்து முதலிடத்தை பிடித்தார். இதற்காக அவருக்கு 25 புள்ளிகள் வழங்கப்பட்டது.
அவரை விட 08.968 வினாடிகள் பின்தங்கிய நிலையில், பந்தய தூரத்தை கடந்த, பெர்ராரி அணியின் வீரரான கார்லோஸ் சைன்ஸ் ஜூனியர் இரண்டாவது இடத்தை பெற்றார்.
அத்தோடு அவர், இரண்டாம் இடத்திற்கான 18 புள்ளிகளையும் பெற்றுக் கொண்டார்.
19.427 வினாடிகள் பின்தங்கிய நிலையில், பந்தய தூரத்தை கடந்த மெக்லரன் அணியின் வீரரான லெண்டோ நோரிஸ் மூன்றாவது இடத்தை பிடித்தார். அதற்கு அவருக்கு 15 புள்ளிகள் வழங்கப்பட்டது.
68.231 வினாடிகள் பின்தங்கிய நடப்பு சம்பியனான மெர்சிடஸ் பென்ஸ் அணியின் லீவிஸ் ஹெமில்டன், ஏழாவது இடத்தை பிடித்தார்.
இதுவரை நடைபெற்று முடிந்துள்ள ஐந்து சுற்றுகளின் முடிவில், மேக்ஸ் வெர்ஸ்டபேன் இரண்டு வெற்றிகளுடன் 105 புள்ளிகளுடன் முதலிடத்தில் உள்ளார்.
இதற்கு அடுத்தப்படியாக லீவிஸ் ஹெமில்டன் மூன்று வெற்றிகளுடன் 101 புள்ளிகளுடன் இரண்டாவது இடத்தில் உள்ளார்.
லெண்டோ நோரிஸ் 56 புள்ளிகளுடன் மூன்றாவது இடத்திலும் உள்ளனர்.
அடுத்த ஆறாவது சுற்றான அசர்பைஜான் கிராண்ட் பிரிக்ஸ், எதிர்வரும் மாதம் ஜூன் 6ஆம் திகதி, பகு சிட்டி சர்வதேச ஓடுதளத்தில் நடைபெறவுள்ளது.
