வவுனியா- திருநாவற்குளத்தில் பயணத்தடை கட்டுப்பாடுகள் கடுமையாக்கப்பட்டுள்ளதாக எமது பிராந்திய செய்தியாளர் தெரிவித்துள்ளார்.
அண்மையில் குறித்த பகுதியிலுள்ள பெண்ணொருவர், கொரோனா வைரஸ் தொற்றினால் உயிரிழந்துள்ளார்.
அதனைத் தொடர்ந்து அவருடன் தொடர்பினை பேணிய பலர் தனிமைப்படுத்தலுக்கு உட்படுத்தப்பட்டுள்ள நிலையில், மேலும் 9 பேருக்கு கொரோனா வைரஸ் தொற்று இன்று (சனிக்கிழமை) உறுதி செய்யப்பட்டுள்ளது.
அத்துடன் குறித்த பகுதியிலுள்ள மக்கள், அநாவசியமாக வெளியில் நடமாடுவதாக சுகாதார பிரிவினர் முறைப்பாடு பதிவு செய்துள்ளனர்.
இந்நிலையில் குறித்த பகுதிக்கு இன்று விஜயம் மேற்கொண்ட வவுனியா சுகாதார வைத்திய அதிகாரி யூட்பீரிஸ் தலைமையிலான குழுவினர், நிலைமைகள் தொடர்பாக ஆராய்ந்தனர்.
அதன்பின்னர், கிராமத்திற்குள் உட் பிரவேசிக்கும் முக்கிய வாயில்களில், பொலிஸார் மற்றும் இராணுவத்தினரை அவர்கள் கடமையில் ஈடுபடுத்தியுள்ளனர்.
மேலும் அத்தியாவசிய தேவைகள் தவிர்ந்த ஏனையவர்கள், கிராமத்திற்குள் உள் நுழைவதற்கும் வெளி செல்வதற்கும் தடை விதிக்கப்பட்டுள்ளமை குறிப்பிடத்தக்கது.
