நாடாளுமன்ற உறுப்பினர்களான கஜேந்திரகுமார் பொன்னம்பலம், செல்வராஜா கஜேந்திரன், முன்னாள் நாடாளுமன்ற உறுப்பினர்களான மாவை சேனாதிராஜா, எம்.கே.சிவாஜிலிங்கம், மாகாணசபை தவிசாளர் சீ.வீ.கே.சிவஞானம் மற்றும் எஸ்.பாலசிங்கம் ஆகியோர்களுக்கு பருத்தித்துறை, வல்வெட்டித்துறை, நெல்லியடி ஆகிய பொலிஸ் நிலையங்களினால் பருத்தித்துறை நீதிமன்றில் தாக்கல் செய்யப்பட்ட வழக்கு தள்ளுபடி செய்யப்பட்டுள்ளது.
நெல்லியடி மற்றும் வல்வெட்டித்துறை பொலிஸாரினால் எம்.கே.சிவாஜிலிங்கத்திறக்கு ஏதிராகவும் பருத்தித்துறை பொலிஸாரினால் முன்னாள் நாடாளுமன்ற உறுப்பினர்களான எம்.கே.சிவாஜிலிங்கம், மாவை சேனாதிராஜா, நாடாளுமன்ற உறுப்பினர்களான செல்வராஜா கஜேந்திரன், கஜேந்திரகுமார் பொன்னம்பலம், வடக்கு மாகாண சபை முதல்வர் சீ.வீ.கே.சிவஞானம் ஆகியோருக்கு எதிராக தாக்கல் செய்யப்பட்ட மனுக்களே இவ்வாறு தள்ளுபடி செய்யப்பட்டுள்ளது.
இந்த விண்ணப்பம் கடந்த வெள்ளிக்கிழமை பருத்தித்துறை நீதிமன்றில் தாக்கல் செய்யப்பட்ட நிலையில், அதில் பெயர் குறிப்பிடப்பட்டவர்களுக்கு அழைப்பாணை அனுப்புமாறு நீதிமன்றினால் அறிவுறுத்தப்பட்டிருந்தது.
இத்தகைய நிலையில், நேற்று (திங்கட்கிழமை) காலை 11 மணியளவில் எடுத்துக்கொள்ளப்பட்ட குறித்த வழக்கு, பொலிஸார் மற்றும் மூத்த சட்டத்தரணி என்.சிறிகாந்தா, மூத்த சட்டத்தரணி வி.திருக்குமரன் உட்பட்ட சட்டத்தரணிகளது சமர்பபணங்களை தொடர்ந்தே பிற்பகல் 3 மணிக்கு தீர்ப்பு வழங்குவதாக தெரிவிக்கப்பட்டது.
இந்நிலையில், பிற்பகல் 4 மணியளவில் கூடிய நீதிமன்றம், பருத்தித்துறை, நெல்லியடி மற்றும் வல்வெட்டித்துறை பொலிஸாரினால் செய்யப்பட்ட விண்ணப்பங்களை ஏற்றுக் கொள்ள முடியாது என்றும் அதனை நிராகரிப்பதாகவும் சட்டங்களை மீறி செயற்பட்டால் அவர்கள் மீது நடவடிக்கை எடுக்கும் அதிகாரம் பொலிஸாருக்கு உண்டு என்றும் நீதிபதி கிருசாந்தன் கட்டளை பிறப்பித்துள்ளார் என்பதும் குறிப்பிடத்தக்கது.
