தென்னாபிரிக்காவில் நான்காவது கொவிட் தொற்றலை எழுந்துள்ளதால், அங்கு ஐந்து வயதுக்குட்பட்ட குழந்தைகளுக்கு அதிகமாகப் பாதிப்பு ஏற்பட்டுள்ளது.
இதுகுறித்து சுகாதாரத் துறை அமைச்சர் ஜோ பாஹ்லா கூறுகையில், ‘ஒமிக்ரோன் வகை கொரோனாவின் வேகமாகப் பரவும் தன்மை காரணமாக, நாடு முழுவதும் நான்காவது கொரோனா அலை எழுந்துள்ளது. நாட்டின் 9 மாகாணங்களில் அந்த வகை கொரோனா பரவல் கண்டறியப்பட்டுள்ளது.
எனினும், இந்த புதிய அலையால் அதிக உயிரிழப்புகள் ஏற்படாமல் தடுக்க முடியும் என்று நம்புகிறோம்.
ஒமிக்ரோனை எதிர்கொள்ள இன்னும் சில நாட்களுக்கு கடுமையான பொதுமுடக்கக் கட்டுப்பாடுகளை அறிவிக்காமலேயே நம்மால் சமாளிக்க முடியும். எனினும், பொதுமக்கள் தங்கள் பங்குக்கு அவர்களது அடிப்படை கடமையான கொரோனா தடுப்பு விதிமுறைகளைப் பின்பற்ற வேண்டும்.
கொரோனா தடுப்பூசி செலுத்திக் கொள்ளக் கூடிய தகுதியுள்ளவர்கள் அனைவரும், அருகிலுள்ள தடுப்பூசி முகாம்களுக்கு உடனடியாகச் சென்று தடுப்பூசியை செலுத்திக்கொள்ள வேண்டும்’ என கூறினார்.
தென்னாபிரிக்காவில் கடந்த மாதம் 24ஆம் திகதி முதல்முறையாகக் கண்டறியப்பட்ட புதிய வகை கொரோனா, தடுப்பூசி செலுத்திக் கொண்டவர்களையும் தொற்றி வருகிறது. ‘பி.1.1.529’ என்ற குறியீடு இடப்பட்ட அந்த வகைக் கொரோனா, கவலைக்குரிய வகையைச் சேர்ந்தது என உலக சுகாதார நிறுவனத்தின் ஆலோசனைக் குழு வகைப்படுத்தியது. மேலும், கிரேக்க எழுத்து முறைப்படி அதற்கு ‘ஒமிக்ரோன்’ எனவும் அந்த அமைப்பு பெயரிட்டது.
தொடக்கத்தில் தென்னாபிரிக்கா மற்றும் போஸ்வானா உள்ளிட்ட அண்டை நாடுகளுக்குப் பரவிய ஒமிக்ரோன், தற்போது இலங்கை, மலேசியா, இந்தியா, அமெரிக்கா, பிரித்தரியா, நெதர்லாந்து, டென்மார்க், ஜேர்மனி, இத்தாலி, அவுஸ்ரேலியா, ஹொங்கொங், கனடா, தென்கொரியா, ஜப்பான், பிரான்ஸ், சவுதி அரேபியா, ஐக்கிய அரபு அமீரகம் உள்ளிட்ட நாடுகளுக்குப் பரவி வருகிறது.
உலகம் முழுவதும் 37 நாடுகள் மற்றும் தன்னாட்சிப் பிரதேசங்களில் 492 பேரிடம் ஒமிக்ரோன் வகை கொரோனா கண்டறியப்பட்டுள்ளதாக புள்ளிவிhரங்கள் தெரிவிக்கின்றன.
