நியூஸிலாந்து அணிக்கெதிரான முதல் டெஸ்ட்: வலுவான நிலையில் பங்களாதேஷ் அணி!

நியூஸிலாந்து மற்றும் பங்களாதேஷ் அணிகளுக்கிடையிலான முதலாவது டெஸ்ட் போட்டியின் மூன்றாம் நாள் ஆட்டம் நிறைவுக்கு வந்துள்ளது.

இதன்படி முதல் இன்னிங்ஸிற்காக துடுப்பெடுத்தாடிவரும் பங்களாதேஷ் கிரிக்கெட் அணி, இன்றைய மூன்றாம் ஆட்டநேர முடிவில், 6 விக்கெட்டுகள் இழப்புக்கு 401 ஓட்டங்களை பெற்றுள்ளது.

ஆட்டநேர முடிவில், யாசிர் அலி 11 ஓட்டங்களுடனும் மெயிடி ஹசன் 20 ஓட்டங்களுடனும் ஆட்டமிழக்காது களத்தில் இருந்தனர்.

நியூஸிலாந்துக் கிரிக்கெட் அணியின் முதல் இன்னிங்ஸ் ஓட்டங்களுடன் ஒப்பிடுகையில், பங்களாதேஷ் கிரிக்கெட் அணி, 73 ஓட்டங்கள் முன்னிலையில் உள்ளது.

நியூஸிலாந்தின் பே ஓவல், மவுண்ட் மவுங்கானுய் மைதானத்தில் கடந்த சனிக்கிழமை ஆரம்பமான இப்போட்டியில், நாணய சுழற்சியில் வெற்றிபெற்ற பங்களாதேஷ் அணி முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாட களமிறங்கிய நியூஸிலாந்து அணி, முதல் இன்னிங்ஸிற்காக 328 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, டெவோன் கோன்வே 122 ஓட்டங்களையும் ஹென்ரி நிக்கோல்ஸ் 75 ஓட்டங்களையும் வில் யங் 52 ஓட்டங்களையும் பெற்றுக்கொண்டனர்.

பங்களாதேஷ் கிரிக்கெட் அணியின் பந்துவீச்சில், சொரிபுல் இஸ்லாம் மற்றும் மெயிடி ஹசன் ஆகியோர் தலா 3 விக்கெட்டுகளையும் மொமினுல் ஹக் 2 விக்கெட்டுகளையும் எபொட் ஹொசைன் 1 விக்கெட்டினையும் வீழ்த்தினர்.

இதனைத்தொடர்ந்து பதிலுக்கு முதல் இன்னிங்சை தொடங்கிய பங்களாதேஷ் அணி, இன்றைய மூன்றாம் நாள் ஆட்டநேர முடிவில், 6 விக்கெட்டுகள் இழப்புக்கு 401 பெற்றுக்கொண்டது.

இதன்போது பங்களாதேஷ் அணி சார்பில், சத்மான் இஸ்லாம் 22 ஓட்டங்களையும் ஹசன் ரோய் 78 ஓட்டங்களையும் நஜ்முல் ஹொசைன் 64 ஓட்டங்களையும் மொமினுல் ஹக் 88 ஓட்டங்களையும் முஷ்பிகுர் ரஹிம் 12 ஓட்டங்களையும் லிடொன் தாஸ் 86 ஓட்டங்களையும் பெற்றுக்கொண்டனர்.

நியூஸிலாந்துக் கிரிக்கெட் அணியின் பந்துவீச்சில், ட்ரெண்ட் போல்ட் மற்றும் நெய்ல் வாக்னர் ஆகியோர் தலா 3 விக்கெட்டுகளையும் வீழ்த்தினர்.

இன்னமும் 4 விக்கெட்டுகள் வசமுள்ள நிலையில், போட்டியின் நான்காம் நாள் ஆட்டத்தை பங்களாதேஷ் கிரிக்கெட் அணி, நாளை தொடரவுள்ளது.