இந்திய மகளிர் கிரிக்கெட் அணியின் முன்னணி துடுப்பாட்ட வீராங்கனை பூனம் ரவுட், சர்வதேச கிரிக்கெட்டின் அனைத்து போட்டிகளிலிருந்தும் தனது ஓய்வை அதிகாரப்பூர்வமாக அறிவித்துள்ளார்.
இவர் 2009 முதல் 2021 ஆம் ஆண்டு வரை இந்திய அணிக்காக 4 டெஸ்ட் போட்டிகள், 73 ஒருநாள் போட்டிகள் (ODI) மற்றும் 35 டி20 போட்டிகளில் விளையாடி குறிப்பிடத்தக்க பங்களிப்பை வழங்கியுள்ளமை குறிப்பிடத்தக்கது.
இந்தியாவுக்காக விளையாடியது எனது வாழ்நாளின் மிகப்பெரிய கௌரவம் , கிரிக்கெட் வெறும் விளையாட்டு மட்டுமல்லாது எனது ஆளுமையை வடிவமைத்து மன உறுதியையும் கற்றுக் கொடுத்தது என்று நெகிழ்ச்சியுடன், தனது ஓய்வு குறித்து இன்ஸ்டாகிராம் பக்கத்தில் பதிவிட்டுள்ளார்.
மேலும், இந்திய அணியின் சீருடையை அணிந்த ஒவ்வொரு கணமும் தனது நனவான கனவு எனவும், தனக்கு ஆரம்பக் கட்டத்தில் உறுதுணையாக இருந்த மும்பை கிரிக்கெட் சங்கத்திற்கும், தனக்கு ஆதரவளித்த அனைவருக்கும் அவர் தனது மனமார்ந்த நன்றிகளைத் தெரிவித்துள்ளார்.
