ஐ.பி.எல். தொடரின் நடப்பு சம்பியனான சென்னை சுப்பர் கிங்ஸ் அணி, நடப்பு தொடர் ஆரம்பமாவதற்கு முன்னதாக பெரும் பின்னடைவை சந்தித்துள்ளது.
அணியின் முதன்மை வேகப்பந்து வீச்சாளர் தீபக் சாஹர், முழுப் போட்டியிலும் இல்லாவிட்டாலும், தொடரின் பெரும் பகுதியை இழக்கவுள்ளார்.
இறுதியாக நடைபெற்ற மேற்கிந்திய தீவுகள் அணிக்கெதிரான இறுதி ரி-20 போட்டியின் போது, தொடைப் பகுதியில் காயம் கண்ட தீபக் சாஹருக்கு எட்டு வாரங்கள் ஓய்வில் இருக்க மருத்துவக் குழு அறிவுறுத்தியுள்ளது.
இதனால், எதிர்வரும் 26ஆம் திகதி ஆரம்பமாகும் ஐ.பி.எல். தொடரின் முதல் பாதி போட்டிகளில் அவர் களமிறங்கமாட்டார் என தெரிவிக்கப்பட்டுள்ளது.
29 வயதான சாஹர், 2022 வீரர் ஏலத்தில் 1.866 மில்லியன் அமெரிக்க டொலர்களுக்கு இரண்டாவது மிக விலையுயர்ந்த வீரராக வாங்கப்பட்டார்.
பந்துவீச்சு சகலதுறை வீரரான சாஹர், தனது கடைசி மூன்று ஒருநாள் போட்டிகளில், சிறப்பான துடுப்பாட்டத்தை வெளிப்படுத்தியிருந்தார் என்பது குறிப்பிடத்தக்கது.
