ஐ.பி.எல்.: தொடர்ச்சியாக மூன்றாவது தோல்வியை பதிவுசெய்தது சென்னை அணி!

ஐ.பி.எல். ரி-20 தொடரின் 11ஆவது லீக் போட்டியில், பஞ்சாப் கிங்ஸ் அணி 54 ஓட்டங்களால் வெற்றிபெற்றுள்ளது.

அதேவேளை, நடப்பு சம்பியன் சென்னை சுப்பர் கிங்ஸ் அணிக்கு, இத்தொடரின் மூன்றாவது தோல்வி இதுவாகும்.

மும்பையில் நேற்று நடைபெற்ற இப்போட்டியில், நாணய சுழற்சியில் வெற்றிபெற்ற சென்னை சுப்பர் கிங்ஸ் அணி முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாடிய பஞ்சாப் கிங்ஸ் அணி, நிர்ணயிக்கப்பட்ட 20 ஓவர்கள் நிறைவில் 8 விக்கெட்டுகள் இழப்புக்கு 180 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, லிவிங்ஸ்டன் 60 ஓட்டங்களையும் தாவன் 33 ஓட்டங்களையும் பெற்றுக்கொண்டனர்.

சென்னை அணியின் பந்துவீச்சில், கிறிஸ் ஜோர்தான் மற்றும் பிரிடோரியஸ் ஆகியோர் தலா 2 விக்கெட்டுகளையும் முக்கேஷ் சௌத்ரி, பிராவோ மற்றும் ஜடேஜா ஆகியோர் தலா 1 விக்கெட்டினையும் வீழ்த்தினர்.

இதனைத்தொடர்ந்து 181 என்ற வெற்றி இலக்கை நோக்கி பதிலுக்கு களமிறங்கிய சென்னை சுப்பர் கிங்ஸ் அணி, 18 ஓவர்கள் நிறைவில் 126 ஓட்டங்களுக்கு சுருண்டது. இதனால், பஞ்சாப் கிங்ஸ் அணி 54 ஓட்டங்களால் வெற்றிபெற்றது.

இதன்போது அணியின் அதிகப்பட்ச ஓட்டங்களாக, சிவம் டுபே 57 ஓட்டங்களையும் டோனி 23 ஓட்டங்களையும் பெற்றுக்கொண்டனர்.

பஞ்சாப் அணியின் பந்துவீச்சில், ராகுல் சஹார் 3 விக்கெட்டுகளையும் வைபவ் ஆரோரா மற்றும் லிவிங்ஸ்டன் ஆகியோர் தலா 2 விக்கெட்டுகளையும் ரபாடா, ஹர்ஸ்தீப் சிங் மற்றும் ஓடியன் ஸ்மித் ஆகியோர் தலா 1 விக்கெட்டினையும் வீழ்த்தினர்.

இப்போட்டியின் ஆட்டநாயகனாக 60 ஓட்டங்களையும் 2 விக்கெட்டுகளையும் சாய்த்த லிவிங்ஸ்டன் தெரிவுசெய்யப்பட்டார்.