இங்கிலாந்துக் கிரிக்கெட் அணிக்கெதிரான இரண்டாவது ரி-20 போட்டியில், தென்னாபிரிக்கா அணி 58 ஓட்டங்களால் வெற்றிபெற்றுள்ளது.
இந்த வெற்றியின் மூலம் மூன்று போட்டிகள் கொண்ட ரி-20 தொடரை 1-1 என்ற கணக்கில் தென்னாபிரிக்கா அணி சமநிலைப்படுத்தியுள்ளது.
தொடரின் வெற்றியைத் தீர்மானிக்கும் இரு அணிகளுக்கிடையிலான மூன்றாவதும் இறுதியுமான ரி-20 போட்டி, நாளை மறுதினம் (ஞாயிற்றுக்கிழமை) ரோஸ் பவுல்- சவுத்தம்ப்டன் மைதானத்தில் நடைபெறவுள்ளது.
நேற்று கார்டிப் மைதானத்தில் நடைபெற்ற இரண்டாவது ரி-20 போட்டியில், நாணய சுழற்சியில் வெற்றிபெற்ற இங்கிலாந்து அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய தென்னாபிரிக்கா அணி, நிர்ணயிக்கப்பட்ட 20 ஓவர்கள் நிறைவில் 3 விக்கெட்டுகள் இழப்புக்கு 207 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ரீலே ரோசோவ் ஆட்டமிழக்காது 96 ஓட்டங்களையும் ரீஸா ஹென்ரிக்ஸ் 53 ஓட்டங்களையும் பெற்றுக்கொண்டனர்.
இங்கிலாந்துக் கிரிக்கெட் அணியின் பந்துவீச்சில், மொயின் அலி, ரிச்சர்ட் க்ளீசன் மற்றும் கிறிஸ் ஜோர்தான் ஆகியோர் தலா 1 விக்கெட்டினை வீழ்த்தினர்.
இதனைத்தொடர்ந்து 208 என்ற வெற்றி இலக்கை நோக்கி பதிலுக்கு களமிறங்கிய இங்கிலாந்து அணி, 16.4 ஓவர்கள் நிறைவில் 149 ஓட்டங்களுக்கு சுருண்டது. இதனால், தென்னாபிரிக்கா அணி 58 ஓட்டங்களால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, ஜோனி பேயர்ஸ்டொவ் 30 ஓட்டங்களையும் ஜோஸ் பட்லர் 29 ஓட்டங்களையும் பெற்றுக்கொண்டனர்.
தென்னாபிரிக்கா கிரிக்கெட் அணியின் பந்துவீச்சில், ஹென்டில் பெலுக்வாயோ மற்றும் டப்ரைஸ் சம்ஸி ஆகியோர் தலா 3 விக்கெட்டுகளையும் லுங்கி ங்கிடி 2 விக்கெட்டுகளையும் ரபாடா மற்றும் மஹாராஜ் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 55 பந்துகளில் 5 சிக்ஸர்கள் 10 பவுண்ரிகள் அடங்களாக ஆட்டமிழக்காது 96 ஓட்டங்களை பெற்றுக்கொண்ட ரீலே ரோசோவ் தெரிவுசெய்யப்பட்டார்.
