ரி-20 உலகக்கிண்ணத் தொடரின் சுப்பர்-12, குழு-01இல் நடைபெற்ற தொடரின் 38ஆவது போட்டியில், அவுஸ்ரேலியா அணி 4 ஓட்டங்கள் வித்தியாசத்தில் வெற்றிபெற்றது.
அடிலெய்ட் மைதானத்தில் இன்று (வெள்ளிக்கிழமை) நடைபெற்ற இப்போட்டியில், அவுஸ்ரேலிய அணியும் ஆப்கானிஸ்தான் அணியும் மோதின.
இப்போட்டியில் நாணய சுழற்சியில் வெற்றிபெற்ற ஆப்கானிஸ்தான் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய அவுஸ்ரேலிய அணி, நிர்ணயிக்கப்பட்ட 20 ஓவர்கள் நிறைவில் 8 விக்கெட்டுகள் இழப்புக்கு 168 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, க்ளென் மேக்ஸ்வெல் ஆட்டமிழக்காது 54 ஓட்டங்களையும் மிட்செல் மார்ஷ் 45 ஓட்டங்களையும் பெற்றுக்கொண்டனர்.
ஆப்கானிஸ்தான் அணியின் பந்துவீச்சில், நவீன் உல் ஹக் 3 விக்கெட்டுகளையும் பாரூக்கி 2 விக்கெட்டுகளையும் முஜிப் உர் ரஹ்மான் மற்றும் ரஷித்கான் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 169 ஓட்டங்கள் என்ற வெற்றி இலக்கை நோக்கி பதிலுக்கு களமிறங்கிய ஆப்கானிஸ்தான் அணியால், 20 ஓவர்கள் நிறைவில் 7 விக்கெட்டுகள் இழப்புக்கு 164 ஓட்டங்களை மட்டுமே பெற முடிந்தது. இதனால், அவுஸ்ரேலியா அணி 4 ஓட்டங்கள் வித்தியாசத்தில் வெற்றிபெற்றது.
இந்த வெற்றியின் மூலம் அரையிறுதிக்கான வாய்ப்பினை அவுஸ்ரேலியக் கிரிக்கெட் அணி, தக்கவைத்துக் கொண்டுள்ளது.
இதன்போது ஆப்கானிஸ்தான் அணியின் அதிகப்பட்ச ஓட்டங்களாக, ரஷித்கான் ஆட்டமிழக்காது 48 ஓட்டங்களையும் குல்பதீன் நய்ப் 39 ஓட்டங்களையும் பெற்றுக்கொண்டனர்.
அவுஸ்ரேலிய அணியின் பந்துவீச்சில், ஜோஸ் ஹெசில்வுட் மற்றும் ஆடம் செம்பா ஆகியோர் தலா 2 விக்கெட்டுகளையும் கேன் ரிச்சட்சன் 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக, 32 பந்துகளில் 2 சிக்ஸர்கள் 6 பவுண்ரிகள் அடங்களாக, ஆட்டமிழக்காது 54 ஓட்டங்களை பெற்றுக்கொண்ட க்ளென் மேக்ஸ்வெல் தெரிவுசெய்யப்பட்டார்.
