துருக்கி மற்றும் சிரியாவை உலுக்கிய நிலநடுக்கத்தால் உயிரிழந்தவர்களின் எண்ணிக்கை ஆயிரத்து 200யைக் கடந்துள்ளது.
சமீபத்திய புதுபிப்பில் துருக்கியில் குறைந்தது 912பேர் உயிரிழந்ததாக துருக்கிய ஜனாதிபதி ரெசெப் எர்டோகன் கூறியிருந்தார்.
தற்போது சிரியாவின் சமீபத்திய உயிரிழப்பு மதிப்பீடு 320 என பிரித்தானியாவை தளமாகக் கொண்ட மனித உரிமைகளுக்கான சிரிய கண்காணிப்பகம் தெரிவித்துள்ளது.
துருக்கியில் குறைந்தது 5,383 பேர் காயமடைந்துள்ளதாகவும் எர்டோகன் கூறினார். சிரியாவில் மேலும் பலர் காயமடைந்துள்ளனர்.
நிலநடுக்கத்தால் துருக்கியில் மட்டும் 912 பேர் உயிரிழந்துள்ளதாகவும், 5,383பேர் காயமடைந்துள்ளதாகவும் துருக்கியின் ஜனாதிபதி ரெசெப் எர்டோகன் தெரிவித்துள்ளார்.
தேடுதல் மற்றும் மீட்புப் பணிகள் தொடர்வதால் உயிரிழப்பு எண்ணிக்கை எவ்வளவு உயரும் என்று கணிக்க முடியாது என அவர் மேலும் தெரிவித்தார்.
1939ஆம் ஆண்டிற்குப் பிறகு நாட்டின் மிகப்பெரிய பேரழிவு இதுவாகும் என்று எர்டோகன் ஊடகங்களிடம் கூறினார். இதன் விளைவாக 2,818 கட்டடங்கள் இடிந்து விழுந்தன.
சிரிய எல்லைக்கு அருகில் தென்கிழக்கு துருக்கியில் ஏற்பட்ட சக்திவாய்ந்த நிலநடுக்கத்தில், உயிரிழந்தவர்களின் எண்ணிக்கை 500ஐ கடந்துள்ளதாக தெரிவிக்கப்படுகின்றது.
துருக்கியில் உயிரிழந்தவர்களின் எண்ணிக்கை தற்போது 284ஆக உயர்ந்துள்ளதாக துருக்கிய துணை ஜனாதிபதி ஃபுவாட் ஒக்டே தெரிவித்தார்.
அதேபோல, சிரியாவில் 230க்கும் மேற்பட்டோர் உயிரிழந்துள்ளதாக அந்நாட்டு ஊடகங்கள் செய்தி வெளியிட்டுள்ளன.
சிரியாவின் எல்லைக்கு அருகில் உள்ள தென்கிழக்கு துருக்கியின் காசியான்டெப்பில் ஏற்பட்ட சக்திவாய்ந்த நிலநடுக்கத்தில், இதுவரை 100க்கும் மேற்பட்டோர் உயிரிழந்துள்ளதாக அங்கிருந்துவரும் செய்திகள் தெரிவிக்கின்றன.
இதேவேளை, சிரியாவில் குறைந்தது 42பேர் உயிரிழந்துள்ளதாக அந்நாட்டு ஊடகங்கள் செய்தி வெளியிட்டுள்ளன. மேலும், 200க்கும் அதிகமானோர் காயமடைந்துள்ளனர்.
அத்துடன் துருக்கியில் பத்து நகரங்கள் பாதிக்கப்பட்டுள்ளன.
7.8 ரிக்டர் அளவிலான நிலநடுக்கம் உள்ளூர் நேரப்படி 04:17 மணிக்கு காசியான்டெப் நகருக்கு அருகே 17.9 கிமீ (11 மைல்) ஆழத்தில் தாக்கியதாக அமெரிக்க புவியியல் ஆய்வு தெரிவித்துள்ளது.
இந்த நிலநடுக்கம் தலைநகர் அங்காரா மற்றும் துருக்கியின் பிற நகரங்களிலும், பரந்த பகுதியிலும் உணரப்பட்டது.
பல கட்டடங்கள் இடிந்து விழுந்துள்ளதுடன், அந்த இடிபாடுகளில் மக்கள் சிக்கியுள்ளதாக தகவல்கள் வெளியாகியுள்ளன. இதனால் உயிரிழப்பு எண்ணிக்கை அதிகரிக்ககூடுமென அஞ்சப்படுகின்றது.
காசியான்டெப், கஹ்ராமன்மாராஸ், ஹடாய், உஸ்மானியே, அதியமான், மாலத்யா, சன்லியுர்ஃபா, அதானா, தியர்பாகிர் மற்றும் கிலிஸ் உள்ளிட்ட 10 நகரங்கள் பாதிக்கப்பட்டுள்ளதாக துருக்கிய உட்துறை அமைச்சர் சுலேமோன் சோய்லு தெரிவித்தார்.
காசியான்டெப்பின் வடகிழக்கில் தியர்பாகிரில் உள்ள ஒரு வணிக வளாகம் இடிந்து விழுந்ததாக தெரிவிக்கப்பட்டுள்ளது.
இந்த நிலநடுக்கம் சிரியா, லெபனான் மற்றும் சைப்ரஸ் ஆகிய நாடுகளிலும் உணரப்பட்டது.
