ஐ.பி.எல். ரி-20 தொடரின் முதலாவது லீக் போட்டியில், நடப்பு சம்பியன் குஜராத் டைடன்ஸ் அணி, 5 விக்கெட்டுகள் வித்தியாசத்தில் வெற்றிபெற்றது.
அஹமதாபாத் மைதானத்தில் நேற்று (வெள்ளிக்கிழமை) நடைபெற்ற இப்போட்டியில், குஜராத் டைடன்ஸ் அணியும் சென்னை சுப்பர் கிங்ஸ் அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற குஜராத் டைடன்ஸ் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய சென்னை சுப்பர் கிங்ஸ் அணி, நிர்ணயிக்கப்பட்ட 20 ஓவர்கள் நிறைவில் 7 விக்கெட்டுகள் இழப்புக்கு 178 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ருத்துராஜ் கெய்க்வாட் 92 ஓட்டங்களையும் மொயின் அலி 23 ஓட்டங்களையும் பெற்றுக்கொண்டனர்.
குஜராத் அணியின் பந்துவீச்சில், ரஷித்கான், மொஹமட் ஷமி மற்றும் அல்சார்ரி ஜோசப் ஆகியோர் தலா 2 விக்கெட்டுகளையும் ஜோசுவா லிட்டில் 1 விக்கெட்டினையும் வீழ்த்தினர்.
இதனைத்தொடர்ந்து 179 என்ற வெற்றி இலக்கை நோக்கி பதிலுக்கு களமிறங்கிய குஜராத் டைடன்ஸ் அணி, 19.2 ஓவர்கள் நிறைவில் 5 விக்கெட்டுகள் இழப்புக்கு வெற்றி இலக்கை கடந்தது. இதனால், குஜராத் டைடன்ஸ் அணி, 5 விக்கெட்டுகள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, சுப்மான் கில் 63 ஓட்டங்களையும் விஜய் சங்கர் 27 ஓட்டங்களையும் பெற்றுக்கொண்டனர்.
சென்னை அணியின் பந்துவீச்சில், ராஜ்வர்தன் ஹங்கர்கேகர் 3 விக்கெட்டுகளையும் டுஸார் தேஷ்பாண்டே மற்றும் ஜடேஜா ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக பந்துவீச்சு மற்றும் துடுப்பாட்டத்தில் அசத்திய குஜராத் அணியின் ரஷித்கான் தெரிவுசெய்யப்பட்டார்.
