மனைவிக்கு 10 ஆண்டுகளாப் போதைப் பொருள் கொடுத்து அவரை 80க்கும் மேற்பட்டோரை வைத்து பாலியல் வன்கொடுமைக்கு உட்படுத்திய மொமினிக் பி( Dominique P)என்பவரைப் பொலிஸார் கைது செய்துள்ளனர்.
பிரான்ஸின் ஏவிக்னான் பகுதியைச் சேர்ந்த இவருக்கு 50 ஆண்டுகளுக்கு முன்னர் திருமணம் நடைபெற்றுள்ள நிலையில் கடந்த 2011 ஆண்டு தொடங்கி 2020 வரை தனது மனைவியின் உணவில் ஒரு வகை போதைப் பொருளைக் கலந்து கொடுத்து அவரை மயக்கமடையச் செய்து, அவர் மயங்கியதும், அந்நியர்களை தனது வீட்டிற்கு வரவழைத்து அவர்களை தனது மனைவியுடன் பாலியல் உறவில் ஈடுபடவைத்து வீடியோ எடுத்து வந்துள்ளார்.
இந்நிலையில் கடந்த பத்து ஆண்டுகளில் 92 பாலியல் வன்கொடுமை சம்பவங்கள் இவ்வாறு இடம்பெற்றுள்ளதாகவும், அதில் குறைந்தது 83 அந்நிய நபர்கள் அவரது மனைவியை பாலியல் வன்கொடுமைக்கு ஆளாக்கியுள்ளதாகவும் தெரிவிக்கப்பட்டுள்ளது.
மேலும் இதற்காக ஒரு இணையத்தளத்தையும் அவர் நடத்திவந்ததாகவும் மனைவிக்கு சந்தேகம் வரக்கூடாது என்பதற்காக யாரும் புகையிலை பயன்படுத்த கூடாது, வாசனை திரவியங்களை போட்டுக்கொள்ளக்கூடாது என நிபந்தனைகளை விதித்திருந்ததாகவும் குறிப்பாக அக்கம்பக்கத்தினருக்கு சந்தேகம் வரக்கூடாது என்பதற்காக அந்நிய நபர்களின் வாகனத்தை வீட்டின் அருகே நிறுத்தாமல் தள்ளி வேறு பகுதிகளில் நிறுத்தி வைக்க வேண்டும் எனவும் வழிகாட்டி வந்துள்ளார் எனவும் கூறப்படுகின்றது.
அத்துடன் இப்பாலியல் வன்கொடுமை சம்பவங்களை இவர் USB கருவியில் ABUSES என்ற பெயரில் பாதுகாப்பாக வைத்திருந்ததாகவும் கூறப்படுகின்றது.
இந்நிலையில் இவரது நடவடிக்கைகள் தொடர்பாக பிரான்ஸ் பொலிஸாருக்கு கடந்த 2020இல் சந்தேகம் ஏற்படவே இது தொடர்பான விசாரணையைத் தொடங்கிருந்தாகவும் அப்போதே இச்சம்பவம் அம்பலமாகியுள்ளதாகவும் தெரிவிக்கப்பட்டுள்ளது.
இந்நிலையில் குறித்த நபர் உட்பட இக்குற்றச் செயலில் ஈடுபட்ட மேலும் 51 பேரைப் பொலிஸார் கைது செய்து விசாரித்து வருவதாகவும் அவர்களில் 26 முதல் 73 வயது வரையானவர்கள் அடங்குவர் எனவும் தெரிவிக்கப்பட்டுள்ளது.
அதேசமயம் அவரது மனைவி, அவரை விவாகரத்து செய்துள்ளதாகவும் தெரிவிக்கப்பட்டுள்ளது.
